हेटौंडाः रोजगारीको क्रममा कतार पुगेका नेपाली युवाले स्थापना गरेको जागरुक युवा समाज नेपालले महोत्तरीका विद्यार्थीलाई शैक्षिक सामग्री सहयोग गरेको छ । गौशाला नगरपालिका–१, बान्हटोल रामनगरमा रहेको राष्ट्रिय आधारभूत विद्यालयमा अध्ययनरत १२५ जना विद्यार्थीलाई शैक्षिक सामग्री सहयोग गरिएको हो ।
कार्यक्रममा राष्ट्रिय आधारभूत विद्यालयका प्रध्यानाध्यापक जय किशोर मण्डलले शिक्षा क्षेत्रमा जागरुक युवा समाजले गरेको काम प्रशंसनीय रहेको बताउनु भयो । शैक्षिक सामग्री पाएसँगै विद्यार्थीहरु पनि खुसी हुनुका साथै विद्यालय नियमित आउने प्रतिवद्धता जनाएका छन् । उहाँले सहयोग गर्ने कतारमा रहेका यस संस्थाका सम्पूर्ण नेपालीहरुलाई धन्यवाद दिनुहुँदै कतारमा रहेका नेपालीले गरेको परिश्रमबाट नेपालमा गरेको सहयोग कदर योग्य भएको बताउनुभयो ।
स्वास्थ्य कार्यालयका प्रतिनिधि होम बहादुर श्रेष्ठले शैक्षिक सामग्री विद्यार्थीका लागि अमूल्य गहना भएकाले कपी, कलम, पेन्सील शिक्षाका लागि पहिलो आवश्यकता भएको बताउनुभयो । उहाँले जागरुक युवा समाजले थोरै–थोरै बचत गरेर पनि विद्यार्थीलाई गरेको सहयोग प्रशंसायोग्य भएको बताउनुभयो । जागरुक युवा समाज सन् २०१४ मा स्थापना भएर सन् २०१८ मा औपचारिक रुपमा काठमाडौं जिल्ला प्रशासन कार्यालयमा दर्ता भई संचालनमा रहेको अध्यक्ष यादव चौलागाईले बताउनुभयो । संस्थाले प्राकृतिक विपत्तिका बेला नेपालका विभिन्न स्थानमा सहयोग गर्दै आएको छ ।
वैदेशिक रोजगारीका क्रममा कतारको राजधानी दोहा स्थित कतार एयरवेजमा कार्यरत नेपालीहरुले आफुले प्राप्त गर्ने तलबबाट बार्षिक ७० रियाल बचत गरेर नेपालमा सहयोग गर्दै आएका छन् । संस्थाका सदस्य विरामी पर्दा संस्थाले सदस्यता कल्याणकारी कार्यक्रम मार्फत सहयोग समेत गर्ने गरेको छ ।
