हेटौंडाः संयुक्त बजार अनुगमन टोलीले आज मकवानपुर जिल्लाको हेटौंडा बजारक्षेत्रका खाद्यान्न पसलको अनुगमन गरेको छ । स्थानीय प्रशासन, खाद्य प्रविधि तथा गुण नियन्त्रण कार्यालय, उपभोक्ता अधिकारवादीसहितको संयुक्त अनुगमन टोलीले हेटौंडा–४, स्कूलरोडस्थित घरसंसार, हेटौंडा–२ स्थित वैद्यनाथ बाबा खाद्यान्न सेन्टर र मणि खाद्यान्न सेन्टरको अनुगमन गरेको छ ।
संयुक्त अनुगमन टोलीले घरसंसारबाट खाद्य वस्तुको जानकारी उल्लेख गरिने लेवल नभएको पाइएको जनाएको छ । मणि खाद्यान्न भण्डारमा भने जगत ब्राण्डको चालमको बोरा तोकिएको भन्दा कम तौल भएको र चनाको दालको उपभोग गर्ने म्याद सकिएको पाइएको खाद्य प्रविधि तथा गुण नियन्त्रण कार्यालयका खाद्य निरीक्षक सुशील कोइरालाले जानकारी दिनुभयो । लेवल नभएको चामल, दाल र पिठोको नमूना संकलन गरिएको जानकारी दिनुहुँदै खाद्य निरीक्षक कोइरालाले भन्नुभयो, ‘मणि खाद्यान्न भण्डारमा अन्य ब्राण्डका चामलको तौल पूरा भए पनि जगत ब्राण्डका केही बोरामा २ सय देखि ३ सय ग्राम तौल कम रहेको पाइएको र चनाको दाल उपभोग गर्ने मिति गुज्रिसकेको पाइएकोले ती सामग्री भएको गोदाम सिल गरिएको छ ।’
संयुक्त अनुगमन समितिले अनुगमनका क्रममा पाइएको अवस्थाका आधारमा जिल्ला प्रशासन कार्यालयले आवश्यकताअनुसार कारवाहीको प्रक्रिया अगाडि बढाउने खाद्य निरीक्षक कोइरालाले बताउनुभयो । वैद्यनाथ खाद्यान्न सेन्टरमा भने कुनै किसिमको समस्या नपाइएको उहाँले बताउनुभयो ।
