हेटौंडाः बागमती प्रदेशका सामाजिक विकास मन्त्री युवराज दुलालले कुष्माण्ड सरोवर त्रिवेणी धाममा लकडाउनका कारण स्थगित रहेको निर्माणको कार्यलाई सुचारु गर्न आग्रह गर्नुभएको छ । आज बिहान अवलोकनका लागि त्रिवेणीधाममा पुग्नुभएका मन्त्री दुलालले निर्माणका कामहरू अब सुचारु गर्न आग्रह गर्नुभएको हो ।
कुष्माण्ड सरोवर त्रिवेणी धाममा अहिले हेटौंडा नगरको परिचय भवन निर्माणको क्रममा रहेको छ भने बागमती प्रदेशको भौतिक पूर्वाधार विकास मन्त्रालयको ३० लाखको लागतमा शवदाह स्थल पनि निर्माण हुने क्रममा रहेको छ । तर सबै निर्माणका काम लक डाउनका कारण स्थगित रहेको छ । शवदाह स्थल निर्माणका लागि सम्झौता गरी काम सुरु गर्न आग्रह गर्दै मन्त्री दुलालले आवश्यक सहयोग गर्न आफु तयार रहेको बताउनुभयो । ‘भौतिक दूरी कायम गरी विकास निर्माणको काम गर्न हामीले निर्देशन दिइसकेका छौं, यसै अब तपाइँहरु पनि काम सुरु गर्नुहोस्,’ मन्त्री दुलालले भन्नुभयो । छोटो समयमा त्रिवेणी धामले धेरै प्रगति हासिल गरेको भन्दै उहाँले अध्यक्ष ईश्वरीप्रसाद न्यौपाने तथा विकासका काममा लाग्नेको प्रशंसा गर्नुभयो । एउटा बगरलाई यतिको महत्वपूर्ण क्षेत्र बनाउनु धेरै ठुलो कुृरा हो भन्दै उहाँले यो क्षेत्रको थप विकासका लागि आफूले सकेको सहयोग गर्ने बताउनुभयो ।
उहाँले एसईई परीक्षाका सम्बन्धमा आफ्नो फरक धारणा रहेको सुनाउनुभयो । अहिलेको अवस्थामा एसईई नलिए पनि हुने उहाँको भनाइ छ । अब कक्षा १२ लाई नै हामीले विद्यालय तहको अन्तिम परीक्षा भनेर भनिरहेको अवस्थामा अहिलेको विषमा परिस्थितिमा एसईई परीक्षा नलिई माथिल्लो कक्षामा विद्यार्थीलाई अपग्रेड गर्नुपर्ने उहाँको भनाइ छ । अवलोकनका क्रममा मन्त्री दुलालललाई त्रिवेणीधाम विकास समितिका सदस्य नेत्रबहादुर थपलिया र ज्योति न्यौपानेले सो क्षेत्रको बारेमा जानकारी गराउनुभएको थियो ।
