हेटौंडाः मानवता प्रबर्द्धनको लागि हेटौंडाको भुटनदेवी चौरमा मंसिर २२ गते बिहीबार हुने ‘नेपथ्य लाइभ कन्सर्ट’को तयारी अन्तिम चरणमा पुगेको छ । आन्तरिक तयारी पुरा भएको र फिल्ड तथा स्टेजको काम जारी रहेको मानव सेवा आश्रम हेटौंडाले जनाएको छ ।
वीरगञ्जको कार्यक्रम सकेर नेपथ्यका मुख्य गायक अमृत गुरुङसहितको टोली आज मंगलबार हेटौंडा आएको छ । नेपथ्यको प्राविधिक टोलीले स्टेज बनाउन सुरु गरेको र अन्य आवश्यक तयारी पनि तीब्र रुपमा अघि बढाएको छ । कन्सर्टमा मुख्य गायक अमृत गुरुङले लोक/पप गीतहरु प्रस्तुत गर्नुहुनेछ । कार्यक्रमको तयारी तीब्र भएको र टिकट विक्री करिब करिब सकिएको मानवसेवा आश्रम हेटौंडाले जनाएको छ ।
मानवता प्रबर्द्धनका लागि मुलुकका प्रमुख १० शहरमा गर्न लागेको कन्सर्टअन्तर्गत मकवानपुरको यो कार्यक्रम तेस्रो हो । यसअघि मंसिर १६ गते विराटनगर र १९ गते वीरगञ्जमा कार्यक्रम सम्पन्न भएको छ । मानव सेवा आश्रम हेटौंडामा हाल १८ जना बालक, ३ जना बालिका, ९४ पुरुष र ७७ जना महिला गरी १९२ जना आश्रित छन् । कन्सर्ट मंसिर २५ गते भरतपुरको क्याम्पाचौरमा, २९ गते नेपालगञ्जको रङ्गशालामा, पौष ३ गते धनगढी रङ्गशाला, ६ गते सुर्खेतको खुल्लामञ्च, ९ गते बुटवलको कालिका मानवज्ञान मावि सेक्टर २ (रामनगर) मैदान, १२ गते पोखराको प्रदर्शनी केन्द्रमा नेपथ्य गुञ्जिने छ ।
अन्तिम कार्यक्रमको रुपमा अङ्ग्रेजी नयाँ वर्षको अघिल्लो रात ‘न्यू इयर इभ’ को दिन पौष १६ गते काठमाडौँको भृकुटीमण्डपमा हुनेछ । कन्सर्टमा सहभागि हुन मानवसेवा आश्रमको मुख्य कार्यालयका साथै अनलाइनबाट पनि टिकट लिन सकिन्छ । टिकट शुल्क एक हजार रुपैयाँ रहेको छ ।
