हेटौंडाः पन्ध्रौं राष्ट्रिय पुस्तकालय दिवसको अवसरमा पुष्पलाल स्मृति पुस्तकालयले अन्तरक्रियाको आयोजना गरेको छ । हेटौंडा–५ स्थित पुष्पलाल स्मृति पुस्तकालयको व्यवस्थापन गर्दै आएको साहित्य संगम मकवानपुरकी अध्यक्ष अनिता न्यौपानेको अध्यक्षता तथा हेटौंडा उपमहानगरपालिका ५ नम्बर वडा अध्यक्ष सुशील घिमिरेको प्रमुख आतिथ्यमा बुधबार अन्तरक्रिया भएको हो ।
अन्तरक्रियामा सहभागीले पठन संस्कृतिको विकासका लागि पुस्तकालयको आवश्यकता औँल्याएका छन् । पठन संस्कृतिको अभावले पुस्तकालयको प्रयोग हुन नसकेको जीकिर गर्दै सहभागीले पठन संस्कृतिको विकासकै लागि पुस्तकालयले विविध क्रियाकलाप गर्नुपर्नेमा जोड दिएका छन् । अन्तरक्रियामा साहित्य संगम मकवानपुरका सचिव एवम् पुष्पलाल स्मृति पुस्तकालय व्यवस्थापन समितिका प्रमुख डीबी बर्तौलाले पुष्पलाल स्मृति पुस्तकालयको सन्चालनको अवस्थाका विषयमा जानकारी गराउनु भएको थियो ।
वडाध्यक्ष सुशील घिमिरेले पुस्तकालयलाई सहयोग गर्ने प्रतिबद्धता व्यक्त गर्नुभयो । पुस्तकालय सञ्चालन र व्यवस्थापनमा उचित योजना बनाएर पुस्तकालय सञ्चालनमा वडाले सक्दो सहयोग गर्ने अध्यक्ष घिमिरेले बताउनुभयो । साहित्यकार दीपक गौतमले घर, विद्यालय र समुदायमा पुस्तकालय हुनुपर्ने बताउनुभयो । पठन संस्कृतिको विकासका लागि पुस्तकालय जरुरी रहेको औँल्याउनुहुँदै गौतमले पुस्तकालयले पाठकलाई आकर्षिकत गर्ने गरी विविध क्रियाकलाप गर्न सुझाव दिनुभयो ।
पुस्तकालय अभियान समूहका सदस्य सुरेश श्रेष्ठले पठन संस्कृतिको विकासका लागि पुस्तकालयमा विशेषगरी विद्यालय तहका बालबालिकालाई आकर्षित गर्नुपर्ने सुझाव दिनुभयो । पढ्नुपर्ने आवश्यकतालाई बुझेका सचेत समूहले नै पुस्तकालयमा पढ्ने प्रचलन नभएका कारण पुस्तकालयको आवश्यकतालाई बेवास्ता गरिरहेको श्रेष्ठले उल्लेख गर्नुभयो । घर, परिवारका सबै सदस्यले नियमित पढ्ने बानीको विकास गर्न सके नयाँ पुस्तामा पठन संस्कृतिको विकास गर्न सकिने श्रेष्ठको भनाइ थियो ।
साहित्यकार चिरन्जीवी लामिछानेले पाठकको मागअनुसार पुस्तकालयकामा पुस्तकको व्यवस्थापन गर्नु पर्ने बताउनुभयो । सेवा निवृत्त शिक्षक समेत रहनुभएका साहित्यकार रमेशमोहन अधिकारीले संगमकै पदाधिकारी, सल्लाहकार, सदस्यले पुस्तकालयको प्रयोग कति गर्र्छन् ? भनी प्रश्न गर्नुका साथै साहित्य संगम र पुस्तकालय व्यवस्थापन समितिका पदाधिकारीको अध्ययन गर्ने र अरुलाई पनि अध्ययनका लागि प्रेरित गर्ने अवस्था रहनुपर्ने बताउनुभयो । पाठकको मागअनुसार पुस्तक उपलब्ध गराउन सक्नुपर्नेमा अधिकारीले जोड दिनुभयो । हेटौंडा क्याम्पसका सहायक क्याम्पस प्रमुख अर्पण पराजुलीले पुस्तकालयको उद्देश्य चेतनाको बीज छर्नु रहेको बताउनुभयो । पुस्तकालयलाई परम्परागत ढाँचामा सन्चालन गर्नु पर्याप्त नहुने उल्लेख गर्नुहुँदै इ–पुस्तकालयको विकास गर्नुपर्ने सुझाव दिनुभएको छ ।
सेवानिवृत शिक्षक विष्णुप्रसाद गौतमले विद्यार्थीमा पुस्तकालय प्रयोगको अवधारणा र अभ्यास नै नभएको बताउनुभयो । सिस्नुपानी नेपाल मकवानपुरका अध्यक्ष राजकुमार लामिछानेले नवप्रतिभा, नयाँ विद्यार्थीलाई लक्षित गरी उनीहरुलाई पुस्तकालय प्रयोगमा आकर्षित गर्नुपर्ने बताउनुभयो । पाठकलाई पुरस्कृत गरेर पनि पुस्तकालयमा आकर्षित गर्न सकिने उहाँले सुझाव दिनुभयो । सेवानिवृत्त शिक्षक जनाद्र्धन खनालले आफू पुस्तक नभई बस्न नसक्ने बताउनुभयो । बालबालिकालाई पढ भन्नुभन्दा सँगै पढ्न बसे बालबालिकाले पढ्ने खनालले बताउनुभयो ।
पुष्पलाल स्मृति पुस्तकालय व्यवस्थापन समितिका सदस्य सुदर्शन अधिकारीले पुस्तकालय स्थापना र सन्चालन गर्न सहज भए पनि पुस्तकालयको प्रयोग गर्ने, पठन संस्कृतिको विकास गर्ने काम चुनौतिपूर्ण रहेको बताउनुभयो । पाठकलाई प्रोत्साहित गर्नु जरुरी रहेको पनि अधिकारीले औँल्याउनुभयो । साहित्य संगम मकवानपुरकी अध्यक्ष अनिता न्यौपानेले बजेटको अभावमा पाठकले खोजी गर्ने पुस्तक उपलब्ध गराउन नसकेको बताउनुभयो । पठन संस्कृतिको विकास गर्न नसकिरहेको पनि न्यौपानेले स्वीकार गर्नुभएको छ । पुस्तकालय दिवसको दिन सबैभन्दा पहिले पुस्तकालयमा प्रवेश गर्नुभएका जनाद्र्धन खनाललाई पुस्तकालयले पुस्तक र मायाको चिनोसहित सम्मान गरेको थियो ।
