हेटौंडाः मकवानपुरमा विद्यालय सञ्चालन भएको पहिलो दिन आधा मात्र विद्यार्थी उपस्थित भएका छन् । ओमिक्रोन भेरियन्टका कारण करिब एक महिनादेखि बन्द भएको विद्यालय आइतबारबाट खुेलेको हो ।
मकवानपुरका हेटौंडा–४ स्थित आधुनिक राष्ट्रिय मावि, भूटनदेवी मावि, हेटौंडा–१ स्थित अमर मावि, हेटौंडा–५ स्थित जेनिथ बोर्डिङ र हेटौंडा–२ स्थित सिद्धार्थ मावि लगायत मकवानपुरका विद्यालयहरुमा पहिलो दिनमा नै पुरा पढाइ भएको छ । आधुनिक माविका प्रधानाध्यापक वीरवंश बैठा भन्नुहुन्छ जोरबिजोर गरी पठनपाठन सुरु गरेका छौंं । विद्यालय सुरु भएको दिनमै विद्यार्थीको उपस्थिति उत्साहपूर्ण रहेको उहाँले बताउनुभयो ।
यसैगरी भूटनदेवी माविका प्रधानाध्यापक माधव दाहालकाअनुसार पहिलो दिन विद्यार्थी उपस्थित तल्लो तहमा न्यून रहे पनि माथिल्लो तहमा भने आधा विद्यार्थीको उपस्थिति रहेको छ । अमर माविकी प्रधानाध्यापक मालती उप्रेतीले पहिलो दिन ६० प्रतिशत विद्यार्थी उपस्थित भएको बताउनुभयो भने जेनिथ माविका शिक्षक प्रिया पाण्डेले पहिलो दिन ९० प्रतिशत विद्यार्थी उपस्थित भएको बताउनुभयो ।
