हेटौंडाः पोखरामा जारी २० औं संस्करणको आहा–रारा गोल्डकप फुटबल प्रतियोगितामा मनाङ मस्र्याङ्दी क्लब फाइनलमा प्रवेश गरेको छ । बिहीबार भएको दोस्रो सेमीफाइनल खेलमा गोलकिपर अशोक बरालको उत्कृष्ट बचाउसँगै त्रिभुवन आर्मी क्लबलाई पराजित गर्दै मनाङ फाइनल प्रवेश गरेको हो । निर्धारित समय र थप गरिएको समयमा पनि गोलरहित बराबरी भएपछि खेल पेनाल्टी सुटआउटमा पुगेको थियो ।
पेनाल्टी सुटआउटमा मनाङले त्रिभुवन आर्मीलाई ४–३ गोलअन्तरले पराजित गरेको हो । मनाङका ४ खेलाडीले गोल गर्दा आर्मीका ३ खेलाडीले मात्रै गोल गर्न सके । आर्मी र मनाङका एक एकजना खेलाडीले प्रहार गरेको बल गोलपोष्टमा लागेर बाहिरिएको थियो भने आर्मीका एक खेलाडीको प्रहार मनाङका गोलकिपर अशोक बरालले बचाएका थिए । मनाङका अशोक प्लेयर अफ द म्याच घोषित भए । मनाङका गोलकिपर अशोक बराल मकवानपुरका खेलाडी हुन् ।
१० लाख राशीको आहा–रारा गोल्डकपको फाइनल खेल शनिबार मनाङ मस्र्याङ्दी र एपीएफ क्लब बीच हुनेछ ।
