हेटौंडाः हेटौंडा–४, हुप्रचौरमा १५ वर्षअघि निर्माण थालनी गरेर पूरा नहुँदै शहीद बासुदेव सभागृह भत्काएर भ्यु टावर बनाइने भएको छ । राज्य कोषको करोडौं रुपैयाँ खर्चेर प्रस्तावित संरचनालाई पूर्णता नदिई हेटौंडा उपमहानगरपालिकाले व्यापारिक भवन निर्माण गर्न लागेको हो । हेटौंडा उपमहानगरपालिकाले बासुदेव सभागृह भत्काएर दुई तलाको अण्डरग्राउण्ड, चारतिरबाट लिफ्ट, दुईवटा भ¥याङसहित सबैभन्दा माथि भ्यूटावर रहनेगरी १३ तले व्यापारिक भवन निर्माण गर्न लागेको छ ।
निर्माणाधिन अवस्थाको भवनको नाम शहीदको सम्मानमा बासुदेव सभागृह राखेर निर्माणको कार्य पूरा नै नगरी भत्काउने स्थानीय सरकारको निर्णयको विरोध भइरहेको छ । सर्वसाधारणको विरोधकै बीच हेटौंडा उपमहानगरपालिकाले हेटौंडा–४, हुप्रचौरमा १३ तलाको बहुउद्देशीय भवन निर्माण गर्नका लागि सोमबार निर्माण कम्पनिसँग सम्झौता गरेको छ । उपमहानगरपालिकाका मेयर हरिबहादुर महतको रोहबरमा प्रमुख प्रशासकीय अधिकृत शिवराज चौलागाईं र लामा/रसुवा/बानियाँ जेभीका सञ्चालक ऋषि बानियाँका बीच सम्झौतापत्रमा हस्ताक्षर गरिएको छ । कुल ७७ करोड ९३ लाख ७२ हजार रुपैयाँ लागत अनुमान गरेर ठेक्का आह्वान गरिएकोमा ४७ करोड ९३ लाख ७२ हजार रुपैयाँ लागतमा काम गर्ने गरी ठेक्का भरेकाले लामा/रसुवा/बानियाँ जेभीसँग सम्झौता गरिएको प्रमुख प्रशासकीय अधिकृत चौलागाईंले जानकारी दिनुभयो ।
बहुउद्देश्यीय भवन निर्माणका लागि भ्याट र कन्टेन्जेन्सीसहित कुल ९६ करोड ३५ लाख ४४ हजार ७ सय १५ रुपैयाँ लागत निस्किएको भएपनि त्यसबाहेकको रकम ७७ करोड ९३ लाख ७२ हजार रुपैयाँ लागत अनुमान गरी ठेक्का आह्वान गरिएको उहाँले बताउनुभयो । आह्वान भएको कुल लागतमा ३८ दशमलव २८ प्रतिशत घटेर लामा/रसुवा/बानियाँ जेभीले ठेक्का प्राप्त गरेको पनि चौलागाईंले जानकारी दिनुभयो । १३ तले व्यापारिक भवनको सबैभन्दा माथि रहने भ्यू–टावरबाट हेटौंडा र आसपासको क्षेत्र सहजरुपमा हेर्न सकिने जनाइएको छ ।
तीन वर्षमा काम सक्नेगरी ठेक्का सम्झौता भएको उपमहानगरपालिकाका योजना महाशाखाका प्रमुख सत्यनारायण साहले जानकारी दिनुभयो । उपमहानगरपालिकाबाट लिएको काममा गुणस्तर कायम गर्दै समयमा नै काम सम्पन्न गर्ने लामा/रसुवा/बानियाँ जेभीका सञ्चालक ऋषि बानियाँले बताउनुभयो ।
हेटौंडामा सबैभन्दा धेरै रकम लगानीमा हेटौंडाको बसपार्कमा बस टर्मिनल, थानाभ¥याङमा तरकारी थोक बजार र सोमबार सम्झौता गरिएको बहुउद्देश्यीय भवन निर्माण गर्न लागिएको मेयर हरिबहादुर महतले बताउनुभएको छ । उपमहानगरपालिकाको ठूलो लगानी भएका तीनवटा संरचनामध्ये दुईवटाको निर्माण कार्य भइरेको मेयर महतले जानकारी दिनुभयो । तरकारी थोकबजार प्रदेश सरकार र उपमहानगरपालिकाको संयुक्त लगानीमा निर्माण गरिएको हो भने अरु दुईवटा संरचना भने उपमहानगरपालिकाको आफ्नै बजेटमा निर्माण हुने उहाँले बताउनुभयो ।
