हेटौंडाः बागमती प्रदेशको मुख्यमन्त्री अष्टलक्ष्मी शाक्यले समानता आफ्नै घरबाट सुरुवात गर्नुपर्ने बताउनुभएको छ । बुधबार जिसस मकवानपुरले आयोजना गरेको दसैँ, दीपावली नेपाल सम्बत र छठ पर्वको शुभकामना आदानप्रदान कार्याक्रममा बोल्नुहुँदै मुख्यमन्त्री शाक्यले सबैले सभ्य रुपले चाडपर्व मनाउनुपर्ने बताउनुभयो । भड्कीलो, खर्चिलो रुपमा चाडपर्व नमनाएर परिवारसँग बसेर पर्व मनाउन आग्रह गर्नुभयो । चाडपर्वमा महिला र पुरुष दुवैले काम गर्नुपर्ने भन्दै महिलाहरुलाई पुरुषले पनि सघाउनुपर्ने बताउनुभयो ।
कुनै पनि संस्कार भित्र विभेद गर्न नहुने भन्दै मुख्यमन्त्री शाक्यले संस्कृतिको जर्गेना गर्दै देशको लोकतन्त्र, गणतन्त्र र संविधानको रक्षा गर्नुपर्ने बताउनुभयो । उहाँले चाडपर्वमा धेरै भिडभाड नगरी स्वास्थ्य सुरक्षामा ध्यान दिन आग्रह गर्नुभयो ।
जिसस मकवानपुरको प्रमुख रघुनाथ खुलालको अध्यक्षतामा भएको कार्यक्रममा बागमती प्रदेशको स्वास्थ्य मन्त्री प्रदीप कटुवाल, उद्योगा पर्यटन वन तथा वातावरण मन्त्री शान्तीप्रसाद पौडेल, राज्यमन्त्री सरस्वती बाटी लगायतको उपस्थिति रहेको थियो ।
