हेटौंडाः बागमती प्रदेशको मुख्यमन्त्री अष्टलक्ष्मी शाक्यले ६६ प्रहरी दिवसको अवसरमा प्रहरीले जनमूखी सोच राखेर सेवा गर्नुपर्ने बताउनुभएको छ । प्रहरी स्थापना भएको ६६ वर्षसम्म धेरै परिवर्तन भएकोले प्रहरीलाई थप चुनौतीको सामना गर्नुपरेको उहाँले बताउनुभयो । समाज बदलिएको बताउँदै मुख्यमन्त्री शाक्यले बागमती प्रदेश प्रहरीले समाजमा शान्ति सुरक्षा, विपद, अपराध नियन्त्रण लगायतमा महत्वपूर्ण भूमिका खेल्नुपर्ने बताउनुभयो ।
मुख्यमन्त्री शाक्यले प्रदेश प्रहरीलाई साधन स्रोतयुक्त बनाई जटिल अपराध नियन्त्रण गर्न पनि अब्बल बन्नुपर्ने बताउनुभयो । प्रहरीलाई स्रोत साधनयुक्त बनाई प्रविधि मैत्री बनाउन बागमती प्रदेश सरकारले सहयोग गर्ने मुख्यमन्त्री शाक्यले प्रतिबद्धता व्यक्त गर्नुभयो । यस्तै बागमती प्रदेश प्रहरीले कोभिड–१९ नियन्त्रण तथा रोकथाम गर्न अंगपंक्तिमा खटेको भन्दै प्रशंसा गर्नुभयो । उहाँले प्रहरी संगठनलाई स्रोतसाधन युक्त बनाएर सोच परिवर्तन गर्न नसकेभने प्रहरी सफल हुन नसक्ने भन्नुभयो । मुख्यमन्त्री शाक्यले प्रहरी असल भावनाले अघि बढेकोले नागरिकमा राम्रो छाप परेको बताउनुभयो । देशमा सुख शान्ति होस् भन्दै उहाँले विभेद र हिंसारहित समाज बनाउन प्रहरी अघि हुनुपर्ने बताउनुभयो । पछिल्लो केही वर्षमा बागमती प्रदेशमा हिंसा, आत्महत्या, दुर्वेशन जस्ता अपराधको घटनाहरु बढिरहेको भन्दै प्रहरीले यसलाई न्यूनिकरण गर्न आवश्यक रणनीति तय गर्नुपर्ने बताउनुभयो । प्रदेशमा लोकतान्त्रिक संस्कार बनाउन प्रहरीले पनि राजनीतिक दलहरुलाई सुझाव दिनुपर्ने मुख्यमन्त्र शाक्यको भनाई थियो ।
यस्तै आन्तरिक मामिला तथा कानुन मन्त्री डा.अजयक्रान्ती शाक्यले छिट्टै प्रहरीको समायोजन हुनुपर्ने बताउनुभयो । बागमती प्रदेश मातहतमा प्रदेश प्रहरी कार्यालय आउनुपर्ने उहाँले धारणा राख्नुभयो । केन्द्र सरकारले प्रहरी समायोजन गर्न ढिलाई गर्दा बागमती प्रदेश सरकारले प्रदेश प्रहरी ऐन बनाएर पनि कार्यान्वयनमा लैजान नसकेको बताउनुभयो । यद्यपि प्रदेश प्रहरीलाई बामगती प्रदेश सरकारले भवन निर्माण, सवारी सधान लगायत साधन स्रोत र प्रविधिमैत्री बनाउन सहयोग गर्दै आएको बताउनुभयो ।
६६ औं प्रहरी दिवसको अवसरमा विर अमर परिवारका सदस्यहरु २ जनालाई सम्मानीत गरिएको थियो । बागमती प्रदेशमा १९१ प्रहरीले विरगति प्राप्ती गरेका छन् । बामगती प्रदेश प्रहरी प्रमुख प्रमुख प्रहरी नायब महानिरीक्षक प्रकाशजंग कार्कीले प्रहरीले आफ्नो ऐन अनुसार नै प्रहरी संगठनलाई परिचालित गरेको बताउनुभयो । उहाँले कानुनभन्दा माथि कोही नभएकोले प्रहरी कसैको नभएको तर सबैको प्रहरी भएको बताउनुभयो । कार्यक्रममा बागमती प्रदेशको आन्तरिक मामिला तथा कानुन मन्त्रालयका सचिव मदन भूजेल लगायत तीनै सुरक्षा निकायको उच्च पदस्थ कर्मचारीको उपस्थिति रहेको थियो ।
