हेटौंडाः बागमती प्रदेशले १३ जिल्लाको काम गर्न नसक्दा मन्त्रिपरिषद् विस्तार गरेको जनाएको छ । प्रदेशका मुख्यमन्त्री अष्टलक्ष्मी शाक्यले भाद्र २ गतेबाट मुख्यमन्त्रीको जिम्मेवारी सम्हालेपछि ३ जनाको मन्त्रिपरिषद् गठन गर्नुभएको थियो । तीमध्ये एक मन्त्रीले केही दिनमै मन्त्रीबाट राजनीमा दिएका थिए । २ जना मन्त्रीले सिंगो प्रदेशको १३ जिल्लाको काम गर्न असहज भएसगै मन्त्रिपरिषद् विस्तार गरेको मुख्यमन्त्री शाक्यको भनाई छ ।
मुख्यमन्त्री शाक्यले मन्त्रिपरिषद् विस्तारसँँगै कामको बाँडफाँड भइसकेकाले १३ जिल्लाको काम गर्न सहज हुने बताउनुभयो । उहाँले आफू सरकारमा रहुन्जेल जनमुखी कार्य गर्ने बताउनुभएको छ । इमान्दारिताका साथ प्रदेशमा कामहरु अघि बढाउने उहाँले बताउनुयभो ।
यसअघि एमाले विभाजन भएसँगै दल रोज्न भाद्र २२ गतेसम्म निर्वाचन आयोगले समय दिएकाले मन्त्रिपरिषद् विस्तार गरिएको थिएन । बागमती प्रदेशका एमालेका १३ सांसदले दल परित्याग गर्दे नेकपा एकीकृत समाजवादी रोजेसँगै मुख्यमन्त्री शाक्यको सरकार अल्पमतमा परिसकेको छ । अल्पमतमा सरकार रहँदा पनि किन ठूलो मन्त्रिपरिषद् विस्तार गरियो भन्ने प्रश्नमा शाक्यले भन्नुभयो, ‘२ जना मन्त्रीले सरकारको काम गर्न असहज भयो । चालु आर्थिक वर्षको विकासका कामहरु अघि बढाउनसमेत जनशक्ति नहुँदा मन्त्रिपरिषद् विस्तार भएको हो ।
बागमती प्रदेशको अहिलेसम्मकै ठूलो मन्त्रिपरिषद् मुख्यमन्त्री शाक्यले बनाउनुभएको हो । यसअघि निवर्तमान मुख्यमन्त्री डोरमणि पौडेलले ७ सदस्यीय मन्त्रिपरिषद् बनाउनुभएको थियो । यस्तै, दोस्रो पटक ८ सदस्यीय मन्त्रिपरिषद् बनाउनुभएको थियो । तर अहिले मुख्यमन्त्री शाक्यले १२ सदस्यीय मन्त्रिपरिषद् गठन गर्नुभएको छ । उहाँले सामाजिक विकास मन्त्रालयलाई फुटाएर दुई मन्त्रालय बनाउनुभएको हो ।
नेकपा एमालेको माधव नेपाल समूहमा रहेर पनि समाजवादी नरोजेका ९ जनामध्ये ३ जना मन्त्री भएका छन् । यस्तै केपी ओली पक्षका ७ जना मन्त्री-राज्यमन्त्री बनेका छन् । मुख्यमन्त्री शाक्यले आफूले एमाले विभाजन भएसँगै विश्वासको मत लिने बताउनुभएको छ । उहाँले विश्वासको मतको सामना गर्ने भन्दै हालसम्म अविश्वासको प्रस्ताव नआएको भन्दै अविश्वासको प्रस्ताव आए भने पनि त्यसको सामना गर्न तयार रहेको बताउनुभयो । आफ्नो सरकार अल्पमतमा परेपनि अन्य दलहरुसँग सहकार्य भइरहेको मुख्यमन्त्री शाक्यले बताउनुभयो । बागमती प्रदेशको १०९ सांसदमध्ये ४३ एमाले सांसद छन् ।
