हेटौंडाः जनता समाजवादी पार्टी (जसपा) को निर्णयपछि मात्र आफू मन्त्री बन्ने विषयमा टुङ्गो लाग्ने प्रतिनिधिसभा सदस्य बिरोध खतिवडाले बताउनुभएको छ । नेकपा एकीकृत समाजवादीका नेता खतिवडाले आफ्नो पार्टीले सरकारसँग गठबन्धन गर्ने निर्णय भएपनि जसपाले गठबन्धनको विषयमा निर्णय गरेपछि मात्र मन्त्रीको छिनोफानो हुने उहाँले बताउनुभयो ।
जसपा सरकारमा जाने वा नजाने भन्ने निर्णय तथा सत्ता साझेदार दलहरुबीच मन्त्रालयको विषयमा सहमति भएपछि मात्र सोहीअनुसार क–कसलाई मन्त्री बनाउने भन्ने विषयमा पार्टीको बैठक बसी छलफल गरिने उहाँको भनाई रहेको छ । आइतबार जसपाको बैठक बसी निर्णय आउने भएकाले आइतबारसम्म थप अरु कुरा गर्न नसकिने सांसद खतिवडाले बताउनुभयो ।
नेकपा एमालेबाट अलग भएर माधवकुमार नेपाल नेतृत्वमा दर्ता भएको एकीकृत समाजवादीले सरकारमा जाने निर्णय गरिसकेपछि एकीकृत समाजवादीले ५ मन्त्रालय पाउने कुरा हुँदै आएको छ । तथापि कुन–कुन मन्त्रालय पाउने भन्ने विषयमा निर्णय नहुँदा मन्त्री को–को बन्ने भन्ने विषयमा अन्तिम निर्णय हुनसकेको छैन । तरपनि मन्त्री बन्नेमा खतिवडाकै नाम सुरुमा आउने गरेको छ ।
