हेटौंडाः नेपाल विद्युत् प्राधिकरणको बागमती प्रदेश डिभिजन कार्यालय हेटौंडाको गत आर्थिक वर्षमा विद्युत् चुहावट घटेको छ । प्रदेश डिभिजन कार्यालयअन्तर्गतका ६ वितरण केन्द्रहरुको चुहावटमा कमी आएको हो ।
आर्थिक वर्ष २०७६/०७७ मा डिभिजन कार्यालयको विद्युत् चुहावट ८.०८ प्रतिशत रहेकोमा गत आर्थिक वर्ष २०७७/०७८ मा ७.७२ प्रतिशतमा झरेको हो । ६.३७ प्रतिशतमा झार्ने लक्ष्य लिएपनि डिभिजन कार्यालयले आफ्नो लक्ष्य भने भेटाउन सकेन ।
नेपाल विद्युत् प्राधिकरण प्रदेश डिभिजन कार्यालय हेटौंडा मातहतमा मकवानपुर, चितवन र सिन्धुली ३ जिल्लाका ६ वटा वितरण केन्द्र पर्दछन् । प्रदेश डिभिजन कार्यालय हेटौंडाअन्तर्गत् हेटौंडा वितरण केन्द्र, पालुङ वितरण केन्द्र, टाँडी वितरण केन्द्र, भरतपुर वितरण केन्द्र, चनौली र सिन्धुली वितरण केन्द्र पर्दछन् ।विद्युतको प्रसारणका क्रममा प्राविधिक त्रुटिका कारण केही प्रतिशत विद्युत् चुहावट हुने गरेको प्रदेश डिभिजन कार्यालयका इन्जिनियर प्रितम विष्टले बताउनुभयो ।
मकवानपुरको उत्तरी क्षेत्रमा रहेको नेपाल विद्युत् प्राधिकरणको पालुङ वितरण केन्द्रमा विद्युत् चुहावट भने गत वर्षमा उल्लेख्य बढेको छ । गत आर्थिक वर्ष २०७७/०७८ मा पालुङ वितरण केन्द्रमा विद्युत् चुहावट बढेको हो । पालुङ वितरण केन्द्रले विद्युत् चुहावटलाई गत वर्षमा ७.५ प्रतिशतमा झार्ने लक्ष्य लिएपनि आर्थिक वर्ष २०७६/०७७ मा ८.३५ प्रतिशत चुहावट रहेकोमा गत वर्ष विद्युत् चुहावट २६.५५ प्रतिशत पुगेको हो ।
पालुङ वितरण केन्द्रले गत वर्षमा ६८ लाख ६७ हजार ७ सय ४० युनिट बिजुली लिएको थियो । उसले ५० लाख ४४ हजार ७५ युनिट विद्युत् बिक्री गरेको छ । झन्डै १८ लाख २३ हजार ६ सय ६५ युनिट बिजुलीको रकम उक्त केन्द्रले गुमाएको छ । पालुङ वितरण केन्द्रमा विद्युत् चुहावट आर्थिक वर्ष २०७३/०७४ मा २०.३४ प्रतिशत रहेको थियो । पछि घट्दै २०७६/०७७ मा ८.३५ प्रतिशतसम्म पुगेको थियो ।
बागमती प्रदेशमा २० वटा वितरण केन्द्र रहेपनि अन्य वितरण केन्द्रहरुको नियन्त्रण उपत्यकाको प्रादेशिक डिभिजन कार्यालयबाट हुँदै आएको छ । डिभिजन कार्यालय हेटौंडाअन्तर्गत्को चनौली वितरण केन्द्रमा भने विद्युत् चुहावट घटेको छ । आर्थिक वर्ष २०७६/०७७ मा १६.३६ प्रतिशत चुहावट रहेको केन्द्रमा गतवर्ष १४.५१ प्रतिशतमा झरेको छ । १२ प्रतिशतमा बिजुली चुहावट झार्ने लक्ष्य रहेको थियो ।
सिन्धुलीमा पनि गत वर्षमा विद्युत् चुहावट ह्वात्तै बढेको छ । आर्थिक वर्ष २०७६/०७७ मा चुहावट बढेर १६.५२ प्रतिशतमा पुगेको छ । सिन्धुली वितरण केन्द्रले गत वर्ष २ करोड ४६ लाख ५० हजार ६ सय २ युनिट बिजुली लिएको थियो । उसले २ करोड ५ लाख ७७ हजार एक सय २ युनिटमात्र बिक्री गरेको छ । ४० लाख युनिट बिद्युत्बाट प्राप्त हुने आम्दानी उक्त केन्द्रले गुमाएको छ । गत वर्षमा ६ प्रतिशतमा चुहावट झार्ने लक्ष्य लिएकोमा बढेर १६.५२ प्रतिशत पुगेको हो ।
यसैगरी मकवानपुरको हेटौंडा वितरण केन्द्रमा पनि विद्युत् चुहावट गत वर्षमा केही बढेको छ । गत वर्षमा विद्युत् चुहावट ५.११ प्रतिशत पुगेको छ । हेटौंडा वितरण केन्द्रले गत वर्ष २७ करोड ४० लाख ६९ हजार १ सय ९२ युनिट विद्युत् लिएको थियो । उसले २६ करोड ६८ हजार ३ सय ७३ युनिटमात्र बिक्री गरेको छ । एक करोड ४० लाख ८ सय १९ युनिट विद्युत् बिक्रीबापत् हुने आम्दानी हेटौंडा वितरण केन्द्रले गुमाएको छ ।
चितवनको टाँडी वितरण केन्द्रमा भने विद्युत् चुहावट १२.७७ प्रतिशतमा झरेको छ । आर्थिक वर्ष २०७७/०७८ मा १६.५३ प्रतिशत चुहावट रहेकोमा गत वर्षमा चुहावट नियन्त्रण भएको देखिन्छ । टाँडी वितरण केन्द्रले गत वर्षमा चुहावटलाई १२.५० प्रतिशतमा झार्ने लक्ष्य पूरा गरेको छ । यसैगरी चितवनको भरतपुर वितरण केन्द्रमा पनि चुहावट दर घटेको छ । गत वर्षमा ५.४८ प्रतिशतमात्रै विद्युत् चुहावट भएको छ ।
