हेटौंडाः मकवानपुरको बकैया गाउँपालिकाका अध्यक्ष दामोदर खनालले आफ्नो जन्मदिनको अवसरमा पुस्तकालयलाई सहयोग गर्नुभएको छ । अध्यक्ष खनालले एक साताअघि मात्रै स्थापना गरिएको बकैया सार्वजनिक पुस्तकालयलाई १० हजार रुपैयाँ सहयोग गर्नुभएको हो ।
हालै स्थापित पुस्तकालयलाई पुस्तक खरिद गर्ने गरी सहयोग गरिएको अध्यक्ष खनालले बताउनुभएको छ । शनिबार पुस्तकालय सञ्चालन तथा व्यवस्थापन समिति गठन गर्न आयोजित भेलामा सहभागी हुनुभएका अध्यक्ष खनालले आफ्नो जन्मदिन समेत परेकोले सहयोग हस्तान्तरण गर्नुभएको छ । गाउँपालिकाका अध्यक्षले सहयोग गर्नुभएको रकमबाट पुस्तक खरिद गरिने पुस्तकालय सञ्चालन तथा व्यवस्थापन समितिका सदस्य गोविन्द चौलागाईले जानकारी दिनुभएको छ ।
शनिबारको भेलाले सुस्मिता घोरसाइनीको अध्यक्षतामा ११ सदस्यीय समिति चयन गरेको छ । असार २६ गते शनिबारका दिन मात्रै पुस्तकालय अभियान समूह मकवानपुरले ५० हजार रुपैयाँ बराबरको पुस्तक सहयोग गरेपछि बकैया सार्वजनिक पुस्तकालयको उद्घाटन गरिएको थियो । समुदायकै सक्रियतामा स्थापित पुस्तकालय सञ्चालन तथा व्यवस्थापनमा पालिकाले सहयोग गर्ने प्रतिवद्धता समेत जनाएको छ ।
