हेटौंडाः मकवानपुर जिल्लाको पूर्वी क्षेत्रमा रहेको बकैया गाउँपालिकाले बिहीबार आर्थिक वर्ष २०७८/०७९ को वार्षिक नीति तथा कार्यक्रम र बजेट सार्वजनिक गरेको छ । गाउँपालिका उपाध्यक्ष सरला बोलखेले ६२ करोड ८३ लाख ७८ हजार ७ सय १९ रुपैयाँको बजेट प्रस्तुत गर्नुभएको हो ।
‘समृद्ध बकैया निर्माणको मूल आधारः स्वास्थ्य, शिक्षा, कृषि, पर्यटन र वातावरणमैत्री पूर्वाधार’को दीर्घकालीन सोच पूरा गर्नेतर्फ प्रतिवद्ध रही गाउँपालिकाले आगामी आर्थिक वर्षको नीति तथा कार्यक्रम ल्याएको छ । गाउँपालिकाले सार्वजनिक गरेको नीति तथा कार्यक्रमअन्तर्गत् शिक्षा क्षेत्रमा केही पुराना कार्यक्रमलाई निरन्तरतासँगै केही नयाँ कार्यक्रम समावेश गरिएको छ ।
गाउँपालिकाले सामुदायिक तथा संस्थागत विद्यालयको शिक्षाको बीचमा देखिएको खाडल कम गर्न शैक्षिक शत्र २०७६ देखि सुरु भएको आधारभूत तहमा अंग्रेजी माध्यमबाट पठनपाठन गर्ने कार्यक्रमलाई थप विद्यालयमा विस्तार गरिने भएको छ । सामुदायिक विद्यालयका शिक्षकहरुलाई बालमैत्री पठनपाठनसम्बन्धी क्षमता विकास तालिम सञ्चालन गरी बालमैत्री कक्षाको व्यवस्थापन गर्नुका साथै विषय शिक्षकहरुको समूहमा गाउँपालिकास्तरमा शिक्षण सिकाईसम्बन्धरु नमुना कक्षाको व्यवस्था गरिने भएको हो ।
यस्तै, विद्यालय व्यवस्थापन समिति, शिक्षक–अभिभावक संघका पदाधिकारीहरु, प्रारम्भीक बालविकास सहजकर्ता, प्रधानाध्यापक, विषय शिक्षक, गाउँ शिक्षा समितिहरुलाई आ–आफ्नो भूमिका, उत्तरदायित्व, सीप विकासलगायत जिम्मेवारी बहन गराउन तालिम, सेमिनार, गोष्ठीहरु सञ्चालन गरिने भएको छ । विद्यालय बाहिर रहेका बालबालिकाहरुलाई विद्यालय शिक्षामा ल्याउनका लागि विशेष प्रोत्साहन कार्यक्रम सञ्चालन गरिनेछ ।
स्रोत विद्यालय, सामुदायिक विद्यालय र अन्य विद्यालयहरुमा भौतिक पूर्वाधार, विज्ञान प्रयोगशाला, जनशक्तिलगायतको उचित व्यवस्थापन गरिने भएको हो । प्रत्येक वडाका कम्तिमा १–१ विद्यालयलाई नमूना विद्यालयको रुपमा विकसित गरी अघि बढाइने भएको छ । त्यसैगरी आवासीय विद्यालयहरुको सुरुवात गरिने भएको छ । कोभिड–१९ बाट भएको शैक्षिक क्षति न्यूनीकरणका लागि सिकाई प्रवद्र्धन कार्यक्रम सञ्चालन गरिने भएको छ । जसका लागि वैकल्पिक शिक्षण सिकाई गरिने भएको हो ।
गाउ“पालिकाभित्र रहेका सामुदायिक विद्यालयहरुमा विद्यार्थी संख्याको आधारमा शिक्षक दरबन्दी मिलान कार्यलाई निरन्तरता दिइने भएको छ । साथै दरबन्दी मिलान गर्दासमेत दरबन्दी अपुग भएको अवस्थामा कार्यविधि निर्माण गरी त्यस्ता विद्यालयहरुलाई विशेष अनुदान दिने मार्गमा अघि बढाउने भएको हो । जुन विद्यार्थी संख्याको आधारमा विद्यालय समायोजनको नीति लिइने भएको छ । यस्तै प्रसुति बिदामा बसेका शिक्षकको सट्टा शिक्षक व्यवस्थापनलाई निरन्तरता दिइने गाउ“पालिकाको नीति तथा कार्यक्रममा सार्वजनिक गरिएको छ ।
गाउँपालिकाभित्रका सामुदायिक विद्यालय सबलीकरण नीति अवलम्बन गरिने कार्य अगाडि बढाइने भएको छ । हरित विद्यालयको अवधारणा, बालमैत्री विद्यालय र विद्यार्थी सिकाउ–टिकाउ कार्यक्रमलाई निरन्तरता भएको छ । प्राविधिक शिक्षा तथा उच्च शिक्षाका लागि जेहेन्दार छात्रवृत्ति कार्यक्रम निरन्तररुपमा सञ्चालन गरिनेछ । गाउ“पालिकाभित्र प्राविधिक शिक्षा निःशुल्क उपलब्ध गराइने भएको हो ।
बालमैत्री कार्यक्रमहरु सञ्चालनका लागि बालकोषको स्थापना गरिनेछ । स्थानीय पाठ्यक्रम निर्माण गरी कार्यान्वयनमा ल्याइने कुरा समेटिएको छ । कक्षा ११ र १२ सञ्चालित सामुदायिक माध्यमिक विद्यालयलाई थप अनुदानको व्यवस्था गरिने भएको छ । बाल विकास शिक्षक तथा विद्यालय कर्मचारीहरुको तलबमान संघीय सरकारको नीतिअनुरुप कार्यान्वयन गरिँदै लगिने भएको छ ।
जहाँ विद्यार्थी त्यहाँ शिक्षक भन्ने नारालाई सार्थक बनाई शैक्षिक गुणस्तर अभिवृद्धि गर्न विषयगत, तहगत शिक्षक, कर्मचारी, बालविकास शिक्षक व्यवस्थापन गरिने भएको छ । स्रोत शिक्षकको व्यवस्थापनलाई निरन्तरता दिने कुरा सहित शिक्षाका क्षेत्रमा २२ वटा बुँदामा गाउँपालिकाले आगामी वर्षको नीति तथा कार्यक्रम सार्वजनिक गरेको छ । गाउँपालिकाले शिक्षा क्षेत्रको नीति तथा कार्यक्रम कार्यान्वयनका लागि विनियोजन गरिएको बजेटबारे विस्तृत विवरण भने उल्लेख गरिएको छैन ।
