हेटौंडाः कोरोना संक्रमण रोकथाम तथा नियन्त्रण गर्न मकवानपुर जिल्लामा निषेधाज्ञा जारी गरिएको एक महिना भएको छ । निषेधाज्ञा भएको एक महिना बितिसक्दा पनि जिल्लामा सोचेअनुरुप कोरोना नियन्त्रण हुन सकेको छैन ।
जिल्ला प्रशासन कार्यालय मकवानपुरले गत बैशाख २० गते निषेधाज्ञा जारी गर्दै सबैलाई घरमै बस्न आग्रह गरेपनि मकवानपुरका बासिन्दाले उक्त निर्णयलाई अटेर गरेको देखिएको छ । निषेधाज्ञा अटेर मात्र नभई कोरोनाबाट बच्न कम्तिमा पनि मास्क लगाउन भनिरहँदा मास्क नै नलगाई हिँड्ने मकवानपुरका ५ सय ५० जनालाई प्रहरीले एक महिनामा कारवाही गरेको छ ।
जिल्ला प्रहरी कार्यालय मकवानपुरले प्रदान गरेको तथ्याङ्क अनुसार निषेधाज्ञाको एक महिनामा जिल्लाका विभिन्न स्थानमा प्रहरीले सुरक्षा जाँच गर्दा मास्क नै नलगाई हिँडडुल गरेका ५ हजार ९ सय १ जनालाई सम्झाई बुझाई गरी मास्क लगाउन आग्रह गरिएको छ । आग्रह गर्दा पनि मास्क लगाउन अटेर गर्ने ५ सय ५० जनालाई कारवाही नै गरिएको जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक जयश्वर रिमालले जानकारी दिनुभयो ।
यस्तै निषेधाज्ञा उल्लङ्घन गर्ने २ हजार ८ सय २३ सवारीलाई होल्डमा राखी छाडिएको तथा २ सय ९६ सवारीलाई कारवाही गरिएको समेत जिल्ला प्रहरी कार्यालय मकवानपुरले जनाएको छ । यसैगरी एक महिनाको अवधीमा निषेधाज्ञा उल्लङ्घन गरेका १ सय ५१ जना मानिसलाई नियन्त्रणमा लिएर सम्झाई बुझाई गरिएको तथा ७७ जनालाई कारवाही नै गरिएको पनि कार्यालयले जानकारी दिएको छ ।
