हेटौंडाः शनिबार मकवानपुरमा ३० जनामा कोरोना संक्रमण पुष्टि भएको छ । हेटौंडा उपमहानगरपालिकाले सञ्चालन गरेको हेटौंडा १० स्थित गोरक्षेश्वर स्वाब नमुना संकलन केन्द्रको अनुसार १२ जना महिला र १८ जना पुरुषमा संक्रमण देखिएको हो ।
शुक्रबार संकलन गरिएको ७१ जनाको स्वाब मध्ये ४२ प्रतिशतमा कोरोना पुष्टि भएको हो । जसमध्ये २७ जना हेटौंडाका रहेका छन् भने कैलाशका २ जना र मनहरीका १ जना संक्रमित रहेका छन् । लगातार ३/४ दिन देखी भइरहेको वर्षाका कारण स्वाब जाँच गरोनेको संख्या पनि घटेको छ । कोरोना भाइरस परीक्षणका लागि शनिबार ७१ जनाको स्वाब संकलन गरिएको छ । बिहान ६ बजेदेखि ८ बजेको समयमा स्वाब संकलन गरिँदै आएको छ ।
जिल्लास्थित स्वास्थ्य संस्थाबाट परीक्षणका लागि सिफारिस भएर आएका व्यक्तिको स्वाब नमूना संकलन गरी दैनिक रुपमा परीक्षण गरिँदै आएको स्वाब नमूना संकलन केन्द्रका जनस्वास्थ्य निरीक्षक भोलाप्रसाद चौलागाईले जानकारी दिनुभएको छ । निषेधाज्ञाका कारण तथा वर्षाका कारण कोरोना संक्रमण परीक्षणका लागि स्वाब नमूना दिन आउने सर्वसाधारणको संख्यामा कमि आएको चौलागाईको भनाई छ ।
गोरक्षेश्वर स्वाब नमुना संकलन केन्द्रले दैनिक रुपमा स्वाब संकलन गरी परिक्षणका लागि प्रयोगशाला पठाउनुका साथै प्राप्त नतिजालाई सार्वजनिक गर्दै आएको छ ।
