हेटौंडाः राष्ट्रिय सभाको बिहीबारको चुनावमा कोभिड–१९ परीक्षण गरेको पीसीआर रिपोर्ट नभएकाहरुले पनि मतदान गर्न पाउने सहमति भएको छ । राष्ट्रिय सभाका उम्मेदवार डा. खिमलाल देवकोटाले पीसीआर रिपोर्ट नभएपनि मत हाल्ने पाउनुपर्ने बताउनुभएको छ । आज हेटौंडामा निर्वाचन कार्यालयले दलका प्रतिनिधिहरुसँग छलफल गरेको थियो । छलफलमा निर्वाचन प्रमुख न्यायाधीस डिल्लीरत्न श्रेष्ठले मतदान गर्न पाउने विषयको सहमतिलाई निर्वाचन आयोगमा पठाउने बताउनुभयो ।
उहाँले बिहीबार भुटनदेवी माविमा हुने चुनावमा कोभिड–१९ संक्रमित भएका मतदातालाई कर्मचारीहरुले स्कटिङ गरेर सुरक्षित साथ मतदान स्थलमा लैजाने व्यवस्था गरेको जानकारी दिनुभयो । यस्तै चुनावमा कोभिड–१९ को पीसीआर परीक्षण नभएकाहरुको लागि ऐन्टिजेन परीक्षण गर्ने तयारी भइरहेको प्रमुख निर्वाचन अधिकारीसमेत रहेका न्यायाधीश श्रेष्ठले बताउनुभयो । मतदान स्थलमा मोबाइल लान नपाइने दलका प्रतिनिधिहरु बिच सहमति बनेको छ ।
चुनावमा ३ वटा बुथ हुनेछ । २ वटा मुख्य र एक विशेष बुथ रहनेछ । संक्रमित भएकाहरुले छुट्टै बुथमा मत खसाल्नेछन् भने संक्रमित नभएका प्रदेश सांसद र स्थानीय तहका प्रमुख÷उपप्रमुखहरुले छुट्टै बुथमा मत खसाल्ने व्यवस्था गरिएको छ । चुनावमा बिहान ९ बजेदेखि ३ बजेसम्म मत खसाल्ने काम हुने र ५ बजेपछि मत गणना गर्ने तयारी गरेको निर्वाचन प्रमुख श्रेष्ठले बताउनुभयो ।
