हेटौंडाः अनौपचारिक क्षेत्र सेवा केन्द्र (इन्सेक) ले वर्ष २०२० मा मानवअधिकार उल्लंघनका घटनाको विवरण समावेश भएको मानव अधिकार वर्ष पुस्तक शुक्रबार सार्वजनिक गरेको छ । देशव्यापी सार्वजनिकीकरण गर्ने क्रममा शुक्रबार बागमती प्रदेशको राजधानी हेटौंडामा पनि मानव अधिकार वर्ष पुस्तक सार्वजनिक गरिएको हो । इन्सेकले हरेक वर्ष प्रजातन्त्र दिवसको अवसरमा वर्ष पुस्तक प्रकाशन गर्ने गरेको छ ।
इन्सेक बागमती प्रदेश कार्यालयका संयोजक कृष्ण गौतमको अध्यक्षता तथा बागमती प्रदेशका मुख्य न्यायाधिवक्ता ओमप्रसाद थपलियाको प्रमुख आतिथ्यमा वर्ष पुस्तक सार्वजनिक गरिएको हो । वर्ष पुस्तक सार्वजनिक गर्नुका साथै सन् २०२० मा बागमती प्रदेशमा मानवअधिकारको अवस्थाका बारेमा अन्तरक्रिया समेत गरिएको थियो । मानव अधिकार वर्ष पुस्तकमा वर्ष २०२० मा कुल पाँच हजार पाँच सय ४३ घटना भएको उल्लेख गरिएको छ ।
२०२० मा तीन सय ५० जनाको हत्या भएको र ४५ जनाको कारागारमा मृत्यु भएको पुस्तकमा उल्लेख गरिएको छ । यस्तै वर्ष २०२० मा बागमती प्रदेशमा मानवअधिकार उल्लंघनका घटनाबाट एक हजार ९२ जना पीडित हुनुपरेको उल्लेख गरिएको छ । बागमती प्रदेशमा ४८ जनाको हत्या भएको र ३६ जनाको कारागारमा मृत्यु भएको उल्लेख गरिएको छ । कार्यक्रममा जिल्ला समन्वय समिति मकवानपुरकी उपप्रमुख भगवती पुडासैनीको पनि उपस्थिति रहेको थियो ।
