हेटौंडाः बागमती प्रदेश प्रहरी कार्यालय हेटौंडाले प्रदेशका विभिन्न जिल्लाहरुमा अवैध रुपमा हुने गरेको लागू औषधको खेती नष्ट गरेको जनाएको छ । मंसिर महिनामा मात्रै प्रदेशको ३७१ बिगाहा क्षेत्रफलमा लगाइएको गाँजा खेती नष्ट गरिएको प्रहरी वरिष्ठ उपरीक्षक मीरा चौधरीले बताउनुभयो । लागू औषध खेती गर्ने र लागू औषधको अवैध ओसार पसारलाई नियन्त्रण गर्न गएको मंसिर महिनालाई लागू औषध बिरुद्धको कार्वाही अभियानको रुपमा संचालन गरिएको उहाँले बताउनुभयो ।
बागमती प्रदेश अन्तर्गतका मकवानपुर, चितवन, सिन्धुली, धादिङ लगाएतका जिल्लाहरुमा अवैध लागू औषधको खेती हुने र पूर्व पश्चिम राजमार्गको धादिङ, चितवन र मकवानपुर ओसारपसार गर्ने मार्ग रहेको हुँदा लागू औषधको गैर–कानुनी खेती र ओसारपसारलाई नियन्त्रण गर्ने उद्देश्यले कार्वाही अभियान संचालन गरीएको प्रदेश प्रहरी कार्यालय हेटौंडाका प्रहरी वरिष्ठ उपरिक्षक मीरा चौधरीले जानकारी दिनुभयो । मसिर महिनामा प्रदेशमा ३७१ बिगाहा, ५६ कठ्ठा २७ धुर जग्गामा लगाइएको गाँजा खेती नष्ट गरीएको छ । अभियानलाई प्रभावकारी बनाउन प्रदेश अन्तर्गतका बिभिन्न जिल्लाहरुमा ४२८ जना प्रहरी कर्मचारी परिचालित गरिएको उहाँले बताउनुभयो ।
मकवानपुरमा २३५ बिगाहा ५ कठ्ठा ५ धुरमा लगाईएको गाँजा खेती नष्ट गरीएको छ भने चितवनमा ५० बिगाहा, सिन्धुलीमा ६३ बिगाहा २५ कठ्ठा १० धुर र धादिङमा २१ बिगाहा ८ कठ्ठा गरी मंसिर महिनामा मात्रै ३७१ बिगाहामा लगाईएको गाँजा खेती नष्ट गरीएको हो ।
