हेटौंडाः अनुदानको मल वितरण व्यवस्थापन निर्देशिका, २०७७ अनुसार मकवानपुरमा पहिलो पटक मकवानपुरगढी गाउँपालिकाले रासायनिक मल वितरण गर्न सुरु गरेको छ । अनुदानका मल वितरण गर्ने निर्देशिका संघीय सरकारले कार्यान्वयनमा ल्याएपछि चालु आर्थिक वर्षमा मकवानपुरमा पहिलो पटक मकवानपुरगढी गाउँपालिकाले मल वितरण गर्न सुरु गरेको हो ।
गाउँपालिकाले उपप्रमुखको संयोजकत्वमा रहने समिति निर्माण गरेर अनुदानको मल वितरण गर्ने १३ वटा सहकारीलाई सूचीकृत गरिसकेको मकवानपुरगढी गाउँपालिकाका कृषि शाखाका प्रमुख चन्द्रकान्त चौधरीले जानकारी दिनुभयो । हालसम्म सूचीकृत भएको १३ मध्ये ५ वटा सहकारीले कृषि सामग्री कम्पनी लिमिटेड बागमती प्रादेशिक कार्यालय हेटौंडामा सूचीकृत गराई रासायनिक मल प्राप्त गरिसकेको छ ।
मकवानपुरगढी गाउँपालिकाका विभिन्न सहकारी संस्थाहरुबाट रासायनिक मल (डीएपी, युरिया र पोटास) बिक्री वितरण गर्न सुुरु भएको हो । गएको बिहीबार मकवानपुरगढीको वडा नम्बर २, ३ र ४ का तीनवटा सहकारीले कृषि सामग्री कम्पनी हेटौंडाबाट एक सय १० बोरा युरिया, ३० बोरा डीएपी र १५ बोरा पोटास लिएर बिक्री गर्न सुरु गरिएको गाउँपालिकाका कृषि शाखा प्रमुख चौधरीले जानकारी दिनुभयो ।
शुक्रबार मकवानपुरगढीको २ र ५ नम्बर वडाका सूचीकृत एक/एक सहकारीले कृषि सामग्री कम्पनीबाट५० बोरा युरिया, ४० बोरा डीएपी र १० बोरा पोटस प्राप्त गरी बिक्री सुरु गरिसकेको छ । गाउँपालिकाले अनुदानको मलको मूल्य पनि निर्धारण गरेको छ । गाउँपालिकाले ढुवानी सस्तो पर्ने र नजिकैको वडाहरु र विकटका वडाहरुमा दुरीको हिसाबले अनुदानको मलको बिक्री मूल्य तोकेको गाउँपालिकाले जनाएको छ । गाउँपालिकाको वडा नम्बर १ र ८ मा पचास किलोको युरिया मल प्रतिबोरा ९ सय ६०, डीएपी प्रतिबोरा २ हजार ४ सय १० र पोटास प्रतिबोरा १ हजार ८ सय १० रुपैयाँ बिक्री मूल्य तोकिएको छ ।
गाउँपालिकाको वडा नम्बर २, ३, ४, ५ र ६ मा युरिया प्रतिबोरा ९ सय १०, डीएपी प्रतिबोरा २ हजार ३ सय ६० र पोटास प्रतिबोरा १ हजार ७ सय ६० रुपैयाँ बिक्री मूल्य तोकिएको छ । गाउँपालिकाको वडा नम्बर ७ मा युरिया प्रतिबोरा ९ सय २५, डीएपी प्रतिबोरा २ हजार ३ सय ८५ र पोटास प्रतिबोरा १ हजार ७ सय ८५ रुपैयाँ बिक्री मूल्य निर्धारण गरिएको गाउँपालिकाका प्रमुख प्रशासकीय अधिकृत रामकुमार पुडासैनीले जानकारी दिनुभयो ।
