हेटौंडाः बागमती प्रदेश सरकारले आगामी भदौबाट प्रदेशका मुख्य सहरमा विद्युतीय बस चलाउने तयारी थालेको छ । विद्युतीय बस सञ्चालनका लागि भौतिक पूर्वाधार विकास मन्त्रालयले यातायात सञ्चालन तथा व्यवस्थापन बोर्ड गठन गरेको छ । मन्त्रालयले बोर्डका निमित्त कार्यकारी निर्देशकको जिम्मेवारी सहदेव भण्डारीलाई दिएको छ । बोर्डमा कार्यकारी निर्देशक र उपकार्यकारी निर्देशक दुई जनाको पदपूर्तिका लागि मन्त्रालयले विज्ञापन गरिसकेको छ ।
चार्जिङ स्टेशन निर्माण गर्न र विद्युतीय बस ल्याउन कम्तीमा आठ महिना लाग्ने भएकाले नौ महिनाभित्र विद्युतीय बस चलाउने योजना बनाइएको बोर्डका निमित्त कार्यकारी निर्देशक भण्डारीले जानकारी दिनुभयो । भौतिक पूर्वाधार विकास मन्त्रालयले आर्थिक मामिला तथा योजना मन्त्रालयसँग १० करोड रकम माग गरेर पठाएको पनि उहाँले बताउनुभएको छ । पहिलो चरणमा प्रदेशको राजधानी हेटौंडासहित प्रदेशका मुख्य सहरहरु धुलिखेल, भरतपुर, काठमाडौं उपत्यका, नुवाकोट र सिन्धुलीमा विद्युतीय बस सञ्चालनका लागि सातवटा रुट तय गरिएको छ । काठमाडौंको रिङरोड, बूढानीलकण्ठ–सातदोबाटो, हेटौंडा–चितवन, काठमाडौं–नुवाकोट, हेटौंडा–नुवाकोट, धुलिखेल–काठमाडौं, हेटौंडा–सिन्धुली, हेटौंडा–चितवन–काठमाडौंलगायत रुट निर्धारण गरिएको छ ।
