हेटौंडा उपमहानगरपालिका–६ स्थित गौरीटार आइसोलेसनमा बस्ने कोरोना सङ्क्रमितहरुको संख्या दिनप्रतिदिन घट्दै गएको छ । सुरुवाती चरणमा संक्रमितले भरिएको गौरिटार आइसोलेसनमा एक सय भन्दा बढी संक्रमितहरुले उपचार सेवा लिएका थिए । अहिले ५–७ जना बस्ने गरेका छन् । कोरोनाका अधिकांश संङ्क्रमितहरु होम आइसोलेसनमा बस्दै आएका छन् । यसै सन्दर्भमा रहेर गौरिटार आइसोलेसनका इन्चार्ज डा. सागर काफ्लेसँग समाज संवाददाता जेनिशा घिमिरेले गर्नुभएको कुराकानीः
समाजः अहिले गौरीटार आइसोलेसन वार्डमा कति जना संक्रमितहरु हुनु हुन्छ ?
काफ्लेः अहिले आइसोलेसन वार्डमा ५ जना हुनु हुन्छ । आइसोलेसनमा रहनुभएका सबैजना इन्जेक्टिबल (सुइबाट) औषधिहरु दिनुपर्ने अवस्थाका हुनु हुन्छ र बेलाबेलामा अक्सिजनसमेत आवश्यक पर्ने बिमारीहरु हुनुहुन्छ । आइसोलेसनमा सामान्य उपचार गर्नुपर्ने छन्, गम्भीर अवस्थाका बिमारी छैनन् ।
समाजः संक्रमितहरुचाहिँ अहिले सरकारले सञ्चालन गरेको आइसोलेसनमा भन्दा पनि होम आइसोलेसनमा बस्न रुचाइराखेको पाइन्छ, किन होला ?
काफ्लेः पहिले धेरै घृणा हुने, हेप्ने भएकाले पनि संक्रमितहरु घरमा बस्न चाहँदैनथे । मान्छेहरुले कोभिड–१९ को बारेमा बुझ्दै गए । कोभिड–१९ का बिरामीलाई अहिले पहिलाको जस्तो घृणा गर्ने गरिएको छैन । त्यही भएर होम आइसोलेसनमा बस्न रुचाएका हुन् । होम आइसोलेसनमा बस्दा पनि हामीले आवश्यक परामर्श दिइरहेका हुन्छौं । गम्भीर अवस्था भए आउनुहोस् भनेका पनि छौं । होम आइसोलेसनमा बस्दा संक्रमितहरुले हामीलाई असहज भए आइसोलेसनमा आउछौं भन्नु भएको छ । उहाँहरु हाम्रो सर–सल्लाहमा सहजरुपमा नै होम आइसोलेसनमा बस्नुभएको हो ।
समाजः अहिले गौरीटार आइसोलेसनले संक्रमितहरुको उपचार के कसरी गरिरहेको छ ?
काफ्लेः हाम्रो गौरीटारमा आइसोलेसन वार्डका साथै ट्रिटमेन्ट सेन्टर पनि छ । हामीले अहिले सामान्य रुघाखोकी लागेका संक्रमितहरुलाई होम आइसोलेसनमा नै परामर्श दिरहेका छौं, त्यसपछिका मध्यमखालका सिस्टोमेटिक बिमारीहरुलाई हामीले यहि आइसोलेसनमा औषधिहरुको प्रयोग गरेर उपचार गरिरहेका छौं । श्वासप्रश्वासमा समस्या पर्ने बिरामीहरुका लागि अक्सिजनको व्यवस्था गरेका छौं । अन्य जटिल अवस्थाका संक्रमितहरुका लागि आवश्यक उपचार गर्ने गरेका छैनौं ।
समाजः अहिले आइसोलेसन वार्डमा बस्ने संक्रमितको संख्या दिनप्रति दिन घट्दै गएको छ । के अब आइसोलेसन वार्ड बन्द हुने अवस्थामा आएको हो त ?
काफ्लेः आइसोलेसन वार्ड बन्द गर्नेतर्फ हामीले सोच्नु हुन्न । धेरै मिहिनेत गरेर हामीले आइसोलेसन वार्ड निर्माण गरेका छौं । यसलाई बन्द गर्ने भन्दा पनि कसरी अझै राम्रो बनाउन सकिन्छ भन्नेतर्फ लाग्नुपर्छ । अहिले श्वासप्रश्वासमा समस्या हुने संक्रमितहरु बस्दै आउनुभएको छ । हामीले उहाँहरुलाई गाह्रो भयो भने समन्वय गरेर भरतपुर रेफर गर्नुपर्ने हुन्छ । हामीले आजै (बिहीबार) पनि एक जनालाई समस्या भएर भरतपुर रेफर गरेका थियौं । यसलाई बन्द गर्ने भन्दा पनि उच्चस्तरबाट सञ्चालन गर्नेतर्फ केन्द्रित रहेका छौं ।
