हेटौंडाः कोरोना भाइरस सङ्क्रमणको जोखिमका कारण २०७६ साल चैत ११ गतेदेखि लकडाउन घोषणा भएयता विद्यालय तथा विश्वविद्यालय तहको पठनपाठन नियमित हुने विषय अझै अन्यौल नै छ । सरकारले वैकल्पिक सिकाई सहजीकरण निर्देशिकादेखि हालै विद्यालय सञ्चालन कार्यढाँचा सार्वजनिक गरेको छ । आठ महिनापछि विद्यालय सञ्चालनको जिम्मा स्थानीय सरकारलाई दिने निर्णय संघीय सरकारले गरेको छ ।
सरकारले वैकल्पिक सिकाई सहजीकरण निर्देशिकाले सबैखाले विद्यार्थीलाई सिकाई सहजीकरण गर्न सकिने अवधारणा अगाडि सारे पनि मकवानपुरको दुर्गम राक्सिराङ गाउँपालिकामा सिकाई सहजीकरण निर्देशिकाबमोजिम विद्यार्थीले सिकाईको अवसर पाएनन् । यसै सन्दर्भमा रहेर सामुदायिक रेडियो, रेडियो निकास ९३.४ मेगाहर्जको साप्ताहिक कार्यक्रम ‘शिक्षाका कुरा’ कार्यक्रमको मंसिर ९ गतेको अंकमा राक्सिराङ गाउँपालिका–८, देवीटारस्थित आधारभूत विद्यालयका प्रधानाध्यापक राजु रेग्मी, शिक्षाका लागि राष्ट्रिय अभियानको सदस्य संस्था बाल कल्याण नेपालका कार्यक्रम व्यवस्थापक केदार आचार्य र शिक्षाका लागि राष्ट्रिय अभियान मकवानपुरका संयोजक समेत रहनुभएका एस्टर बेञ्जामिन स्मृति संस्थाका कार्यक्रम संयोजक बुद्ध लामा सहभागी हुनुहुन्छ ।
केही सातादेखि शिक्षाका लागि राष्ट्रिय अभियान र रेडियो निकासको सहकार्यमा रेडियो कार्यक्रम ‘शिक्षाका कुरा’ को निर्माण तथा प्रसारण भइरहेको छ । मंसिर ९ गते मंगलबार साँझ ५ बजेको निकास सामुदायिक खबरपछि कार्यक्रम शिक्षाको कुरा सुन्न सक्नुहुनेछ । रेडियो निकास ९३.४ मेगाहर्जका साथै मोवाईल एप्लिकेशनको रेडियो निकास र अनलाइनको पहूँचमा रहनुहुने तपाइँले www.radionikas,comमा पनि सुन्न सक्नुहुनेछ । कृपया सुन्ने प्रयास गर्नुहोला ।
