हेटौंडाः हेटौंडा–५, पिप्लेस्थित सञ्जीवनी बचत तथा ऋण सहकारी संस्था लिमिटेडको १९ औं वार्षिक साधारणसभाको समापन कार्यक्रम आज भएको छ । कोभिड–१९ सङ्क्रमणको जोखिमका कारण कार्तिक १६ गतेबाट साधारणसभाको सुरुवात गरिएको थियो । सहकारीको कार्यालयमै साधारण सदस्यलाई उपस्थित हुन आव्हान गरी सहकारीको वार्षिक प्रतिवेदन वितरण गर्नुका साथै सेयर सदस्यहरुबाट आवश्यक सुझाव समेत सङ्कलन गरेर आज समापनको कार्यक्रम गरिएको सहकारीकी अध्यक्ष जानकी चौधरीले बताउनुभएको छ ।
साधारणसभाको समापन कार्यक्रम सहकारीकी अध्यक्ष जानकी चौधरीको अध्यक्षता तथा हेटौंडा उपमहानगरपालिकाका मेयर हरिबहादुर महतको प्रमुख आतिथ्यमा भएको थियो । साधारणसभाको समापनको अवसरमा सहकारीले पूर्वसञ्चालक, ज्येष्ठ सेयर सदस्य, पूर्वकर्मचारी, कार्यरत कर्मचारी, सेयर सदस्य परिवारका विद्यार्थी, सेयर खरिदकर्ता, असल ऋणी, असल बचतकर्ता, पत्रकारलाई सम्मान समेत गरेको छ । साधारणसभाको समापन कार्यक्रममा मकवानपुर जिल्ला बचत तथा ऋण सहकारी संघ लिमिटेडका सचिव वीरेन्द्रप्रसाद ढुङ्गाना, सहकारीका संस्थापक अध्यक्ष पूर्णबहादुर खनाल, निवर्तमान अध्यक्ष रणबहादुर कार्कीको पनि उपस्थिति रहेको थियो ।
तनि हजार ७० सेयर सदस्य भएको सहकारीको सेयर पुँजी दुई करोड ८४ लाख चार हजार रुपैयाँ रहेको छ । यस्तै २२ करोड ८० लाख ८८ हजार रुपैयाँ बचत सङ्कलन गरेको सहकारीले २१ करोड ६९ लाख छ हजार रुपैयाँ ऋण लगानी गरेको छ ।
