हेटौंडाः मकवानपुरको मनहरी गाउँपालिकाले मनहरी गाउँपालिकामा कोरोनाको सङ्क्रमणको दर बढेको भन्दै अत्यावश्यक काम बाहेक घर बाहिर ननिस्कन आग्रह गरेको छ । आइतबार मनहरी गाउँपालिकाका प्रमुख प्रशासकीय अधिकृत देवराज चौलागाईद्वारा हस्ताक्षरित एक सूचनामा गाउँपालिका तथा वडाका अधिकांश स्थानमा कोरोनाका सङ्क्रमितहरु थपिएका कारण सुरक्षित रहन अनुरोध गरिएकोे छ ।
गाउँपालिकाले दशैंमा पालिकाभित्र नवरथा पुजा, लङ्गूरबुर्जा, जुवातास, खेलाउने कार्यमा रोक लगाएको छ । धेरै भीडभाड गर्दा कोरोना फैलन सक्ने भएकोले मनहरी गाउँपालिकाले नित्य पूजा बाहेक मन्दिरमा सर्वसाधारणहरुलाई प्रवेश निषेध गरेको छ । घरैमा बसेर आफ्नो परिवारमा वडा दशैं मनाउन पालिकाले आग्रह गरेको छ । आफ्नै घरमा स्वास्थ्य र सुरक्षा अपनाई दशैं मनाउन र गाउँपालिकाको अत्यावश्यक बाहेकका अन्य सेवाहरुको लागि इमेल, फोन सम्पर्क गर्न सर्वसाधारणहरुलाई आग्रह गरेको छ ।
मनहरी गाउँपालिकाको कर्मचारीमा कोरोना पुष्टि भएसँगै थप फैलन सक्ने भन्दै गाउँपालिकाको अन्य सेवा कार्तिक ६ गतेसम्मका लागि बन्द गरिएको छ । मनहरी गाउँपालिकामा हालसम्म एक सय ३८ जनामा कोरोना भाइरसको सङ्क्रमण देखिएको छ । यस्तै एक सय जना निको भएका छन् भने घरमै आइसोलेसन र संस्थागत आइसोलेसनमा हाल ३७ जना बसेका छन् । यस्तै १ जनाको भने कोरोना भाइरसको कारण ज्यान गएको मनहरी गाउँपालिकाका सिनियर अहेब ज्योतिराज लुइटेलले जानकारी दिनुभयो ।
