हेटौंडाः मकवानपुरको मनहरी गाउँपालिकाले कार्तिक १६ गतेबाट सिकाई सहजीकरण योजना अनुसार विद्यालयहरु सञ्चालन गर्ने भएको छ । मनहरी गाउँपालिकामा रहेका सामुदायिक विद्यालय ३२ र निजीतर्फका ८ विद्यालयहरुले सिकाई सहजीकरण योजना अनुसार विद्यार्थीहरुलाई अध्यापन गराउने तयारी भएको मनहरी गाउँपालिकाका शिक्षा शाखाका प्रमुख हरिचन्द्र सापकोटाले बताउनुभयो । विद्यालयहरुले आफ्नै सिकाई योजना अनुसार कक्षागत पढाई सुरु गर्ने भएको उहाँले बताउनुभयो ।
यस्तै मनहरी गाउँपालिका–१ को श्री प्राथमिक विद्यालय चकरीले भने गएको २ हप्तादेखि नै विद्यालयहरु सञ्चालन गर्दै आएको विद्यालयका प्रधानाध्यापक नवराज डोटेलले बताउनुभयो । कुल ७७ जना विद्यार्थी रहेको विद्यालयले अभिभावहरुसँगको समन्वयमा विद्यालय खोलेको जानकारी दिनुभयो ।
विशेष गरेर ग्रामिण क्षेत्रमा कोरोना भाइरसको प्रभाव कम परेको कारण विद्यालय सञ्चालन गरेको उहाँको भनाइ छ । यस्तै मनहरीको राष्ट्रिय रोटरी माविले भने हाललाई विद्यालयबाट प्रोजेक्ट वर्क दिएर विद्यार्थीलाई पठाएको छ । एक साता अनलाईन कक्षा १० देखि १२ सम्म भएपनि प्रभावकारी नदेखिएकोले बन्द गरिएको विद्यालयका प्रधानाध्यापक गोविन्दप्रसाद पौडेलले बताउनुभयो । मनहरी गाउँपालिकाले आइतबार अनुमति दिएसँगै अब १६ गतेबाट शिक्षण सिकाईलाई निरन्तरता दिने उहाँले जानकारी दिनुभयो ।
मनहरी गाउँपालिकाले आइतबार एक सूचना जारी गर्दै कार्तिक १५ गतेसम्म सम्पूर्ण विद्यालय बन्द रहने र १६ गतेबाट शिक्षण सिकाई क्रियाकलाप र प्रशासनिक कार्य यथावत रुपमा सञ्चालन गर्न सम्पूुर्ण विद्यालयलाई अनुरोध गरेको छ ।
