हेटौंडाः विश्व शान्ति दिवसको अवसरमा विश्व शान्तिको कामना गर्दै नेपाल स्काउटले हेटौंडामा शान्ति दौडको आयोजना गरेको छ । आज बिहान हेटौंडा–१५, रातोमाटेबाट नेपाल स्काउटको हेटौंडा ओपन स्काउट क्र्युका रोभर लिडर अशोक सारु मगरले करिब ७ किलोमिटरको यात्रा तय गरी बागमती प्रदेशका मुख्यमन्त्री डोरमणि पौडेललाई भेटेर शान्तिको सन्देश अभियान र स्काउट कार्यक्रमका बारेमा जानकारी विश्वशान्ति झण्डा हस्तान्तरण गर्नुभएको छ ।
धावक अशोक सारु मगरलाई स्काउटका अन्य पदाधिकारीले स्कर्टिङ गरेका थिए । शान्ति झण्डा ग्रहण गर्नुहुँदै बागमती प्रदेशका मुख्यमन्त्री डोरमणि पौडेलले विश्व शान्ति दिवसको शुभकामना दिनुहुँदै स्काउटको कार्यक्रम विकास र शान्ति निर्माण प्रक्रियामा प्रदेश सरकारको साथ र सहयोग रहने प्रतिवद्धता व्यक्त गर्नुभयो । विश्व शान्ति दिवसकै अवसरमा नेपाल स्काउट मकवानपुरले हेटौंडा–५ मा वृक्षरोपण समेत गरेको छ । हेटौंडा उपमहानगरपालिकाका मेयर हरिबहादुर महत, ५ नम्बर वडा अध्यक्ष राजेश बानियाँको उपस्थितिमा वृक्षरोपण गरिएको हो ।
