हेटौँडा : प्रतिनिधि सभा सदस्य निर्वाचनको कार्यक्रमअन्तर्गत बिहिबार मतदानको कार्यक्रम रहेको छ । मतदानका लागि हेटौँडा उपमहानगरपालिकाका १९ वटा वडामा २७ वटा मतदानस्थल रहेका छन् । हेटौँडाका १९ वटा वडा मध्ये १५ वटा वडा निर्वाचन क्षेत्र नम्बर १ मा पर्दछ भने ४ वटा वडा क्षेत्र नम्बर २ मा रहेको छ । हेटौँडामा सबैभन्दा बढी मतदाता ४ नम्बर वडामा छ भने सबैभन्दा कम मतदाता १० नम्बर वडामा रहेको छ ।
प्रतिनिधिसभा सदस्य निर्वाचन क्षेत्र नम्बर २ मा हेटौँडा उपमहानगरपालिकाको वडा नम्बर १, ३, ११ र १९ पर्दछ भने बाँकी वडा क्षेत्र नम्बर १ मा पर्दछ । हेटौँडा–४ मा ९ हजार २ सय ६७ मतदाता छन् । हेटौँडा–४ का मतदाताले भुटनदेवी माध्यमिक विद्यालयस्थित मतदानस्थलमा पुगेर मतदान गर्नुपर्नेछ । भुटनदेवी माविमा ९ वटा मतदान केन्द्र निर्धारण गरिएको छ । यस्तै हेटौँडा–१० मा ४ हजार २६ जना मतदाता रहेका छन् । हेटौँडा–१० का मतदाताले ज्ञानदा माध्यमिक विद्यालयस्थित मतदान केन्द्रमा मतदान गर्नेछन् ।
बिहिबार हुने मतदानमा हेटौँडा–१ मा २ वटा मतदानस्थल कायम गरिएको छ । रोपवे भवनमा ४ वटा केन्द्र राखिएको छ भने ३ हजार ८ सय ७८ मतदाताले मतदान गर्नेछन् । यस्तै लालझाडीस्थित बाराही माध्यमिक विद्यालयमा २ वटा मतदान केन्द्रमा १ हजार ४ सय ४ जना मतदाता रहेका छन् । हेटौँडा–२ का मतदाताले सिद्धार्थ माविमा मतदान गर्नेछन् । हेटौँडा–२ मा ५ हजार ४ सय ९३ मतदाता छन् । हेटौँडा–३ मा महेन्द्रकिरण माध्यमिक विद्यालयमा ५ वटा केन्द्रमा ४ हजार ९ सय ८७ मतदाता रहेका छन् । हेटौँडा–५ स्थित बालज्योति माध्यमिक विद्यालयमा ९ वटा मतदान केन्द्रमा ८ हजार ९ सय ३८ मतदाता रहेका छन् ।
हेटौँडा–६ स्थित बंशगोपाल माध्यमिक विद्यालयमा ५ वटा मतदान केन्द्र निर्धारण गरिएको छ । हेटौँडा–६ मा ५ हजार २ सय ९२ मतदाता छन् । हेटौँडा–७ का मतदाताले नवज्योति माध्यमिक विद्यालयमा पुगेर मतदान गर्नुपर्नेछ । ४ हजार २ सय ८७ जना मतदाता रहेको हेटौँडा–७ मा ५ वटा मतदान केन्द्र निर्धारण गरिएको छ । हेटौँडा–८ का मतदाताले चन्द्रोदय माध्यमिक विद्यालयमा मतदान गर्नुपर्नेछ । चन्द्रोदय माविमा ७ वटा मतदान केन्द्र तय गरिएको छ । हेटौँडा–९ स्थित प्रगति माध्यमिक विद्यालयमा ७ वटा मतदान केन्द्र निर्धारण गरिएको छ भने ७ हजार १ सय ५९ मतदाता छन् । हेटौँडा–१० का मतदाताले ज्ञानदा माध्यमिक विद्यालयमा निर्धारण गरिएको ४ वटा मतदान केन्द्रमा पुगेर मतदान गर्नुपर्नेछ । हेटौँडा–११ मा ६ हजार ९ सय ९० मतदाता छन् । त्रिभुवन माध्यमिक विद्यालयमा ७ वटा मतदान केन्द्र तय गरिएको छ ।
यस्तै हेटौँडा–१२ स्थित प्रतिभा आधारभूत विद्यालयमा ४ हजार ६ सय ७९ मतदाता छन् भने विष्णुज्योति आधारभूत विद्यालयमा ३ हजार ७ सय ७३ मतदाता रहेका छन् । हेटौँडा–१३ मा महेन्द्र माध्यमिक विद्यालय र कालिका निम्न माध्यमिक विद्यालयमा मतदान केन्द्र बनाइएको छ । महेन्द्र माविमा ३ हजार ५ सय ९५ जना मतदाता रहेका छन् भने कालिका निमाविमा २ हजार ४ सय ६५ मतदाता छन् । हेटौँडा–१४ मा जनज्योति माविमा मतदान केन्द्र तयार पारिएको छ । जनज्योति मावि केन्द्रमा ४ हजार ९ सय ३६ मतदाता छन् । हेटौँडा–१५ को वडा कार्यालयमा ३ हजार ७ सय ४० मतदाताले मतदान गर्नेछन् भने चुरियामाई माविमा २ हजार ६ सय ११ मतदाताले मतदान गर्नेछ ।
हेटौँडा–१६ को जनप्रिय माध्यमिक विद्यालय मतदान केन्द्रमा ३ हजार ३ सय ३६ जना मतदाता छन् भने त्रिभुवन मावि केन्द्रमा २ हजार ६५ मतदाता छन् । हेटौँडा–१७ को दिव्यज्योति आधारभूत विद्यालय केन्द्रमा २ हजार ५ सय ७० मतदाता छन् भने लक्ष्मी आधारभूत विद्यालयमा ३ हजार २ सय ९९ मतदाता छन् । यस्तै हेटौँडा–१८ को कमला आधारभूत विद्यालय केन्द्रमा १ हजार ५ सय ७७ मतदाता छन् भने ज्योति माविमा ४ हजार ४ सय ६९ मतदाता छन् । हेटौँडा–१९ को निर्मल माध्यमिक विद्यालय केन्द्रमा ४ हजार १ सय ८२ मतदाता छन् भने कालिका आधारभूत विद्यालयमा १ हजार ७ सय १७ मतदाता छन् ।
