हेटौंडाः नेपाली काङ्ग्रेस बागमती प्रदेश संसदीय दलका नेता तथा नेपाली काङ्ग्रे्रेस मकवानपुरका सभापति इन्द्रबहादुर बानियाँले आज हेटौंडा–६, गौरिटारस्थित आइसोलेसन वार्डको स्थलगत अनुगमन गर्नुभएको छ ।
मदन भण्डारी स्वास्थ्य विज्ञान प्रतिष्ठान मातहतको हेटौंडा अस्पतालले सञ्चालन गरेको आइसोलेसन वार्डको अनुगमन गरी उहाँले आइसोलेसनमा भएका समस्याहरुको समाधान गर्न तथा व्यवस्थापन गर्न प्रदेश सरकारलाई आग्रह गर्ने बताउनुभयो । यस्तै हेटौंडामा सङ्कलन गरिएको स्वाबको कोरोना रिपोर्ट ८ दिनसम्म नआउनु गम्भीर विषय रहेको भन्दै यसबारे प्रदेश सरकारको ध्यानाकर्षण गराइने उहाँले बताउनुभयो । नेता बानियाँले अनुगमनका क्रममा कोरोना विरुद्ध लड्न र आइसोलेसन व्यवस्थापन गर्न नेपाली काङ्ग्रेसले आवश्यक सहयोग गर्ने पनि बताउनुभएको छ । बानियाँसँगै ६ नम्बर वडा अध्यक्ष अर्जुनप्रसाद चौलागाई, १६ नम्बर वडा अध्यक्ष रामकृष्ण कोइरालाले पनि आइसोलेसन वार्डको अनुगमन गर्नुभएको थियो ।
