हेटौंडाः निमोनियाको उपचार गर्ने क्रममा मृत्यु भएका हेटौंडा–४ का ५४ वर्षीय पुरुषमा कोरोना भाइरस सङ्क्रमण पुष्टि भएको छ । साउन ३२ गतेदेखि खोकी लागेपछि हेटौंडामै उपचार गराउँदा निमोनिया भएको भनेर औषधी खान सुरु गरेपनि खोकी कम नभएपछि भदौ ३ गते भरतपुरस्थित पुरानो मेडिकल कलेज लगिएको थियो । भरतपुरस्थित पुरानो मेडिकल कलेजमै उपचार गराउने क्रममा भदौ ४ गते राती मृत्यु भएको थियो ।
मृत्यु भएपछि स्वाबको नमूना संकलन गरेर परीक्षण गर्दा कोरोना भाइरस सङ्क्रमण पुष्टि भएको मृतकका छोराले जानकारी दिएका छन् । निमोनियाको समयस्या यसअघि थाहा नभएको उल्लेख गर्दैै मृतकका छोराले भने, ‘तत्कालको समस्या नभई लामो समयदेखि फोक्सोमा समस्या देखिएको र निमोनियाका कारण मृत्यु भएको चिकित्सकको भनाइ छ ।’ कोरोना सङ्क्रमण पुष्टि भएसँगै मृतकको शवको व्यवस्थापन भरतपुरमै नेपाली सेनाले गर्नेछ । यहाँ हेटौंडा–४ स्थित मृतकको घर स्थानीय प्रशासनले सिल गरिसकेको छ । स्थानीय प्रशासनले मृतकका परिवार र सम्पर्कमा आएका व्यक्तिको स्वाब संकलन गरेर कोरोना परीक्षण गर्नेछ ।
