हेटौँडा हेटौँडा–२ स्थित बालजागृति ईंग्लिस सेकेण्डरी स्कुलले आफ्ना विद्यार्थीको सहभागितामा संयुक्त राष्ट्रसंघीय नमूना महासभाको आयोजना गरेको छ । कक्षा–७, ८, ९ र १० का ९० जना विद्यार्थीको सहभागितामा बालजागृृतिले पहिलो पटक नमूना महासभाको आयोजना गरेको हो ।
विद्यार्थीलाई संयुक्त राष्ट्रसंघीय महासभाको माध्यमबाट अन्तर्राष्ट्रिय संस्थाको अवधारणा र अभ्यास बुझाउने प्रयास गरिएको बालजागृतिका प्रिन्सीपल विनोद सुवेदीले जानकारी दिनुभयो । नमूना महासभाको कार्यक्रमलाई हरेक वर्ष आयोजना गरिने प्रिन्सीपल सुवेदीले बताउनुभएको छ । विद्यालय सञ्चालक समितिका अध्यक्ष दिनेशप्रसाद भण्डारीको अध्यक्षता तथा संयुक्त राष्ट्रसंघको विश्व खाद्य कार्यक्रमका पूर्व कर्मचारी राजु क्षेत्रीको प्रमुख आतिथ्यमा आज बिहान उद्घाटन कार्यक्रम भएको हो । भोलि आइतबारसम्म सञ्चालन हुने कार्यक्रममा मदरल्याण्ड स्कूलका विद्यार्थीको पनि सहभागिता रहेको छ ।
