हेटौंडाः बागमती प्रदेशको राजधानी हेटौंडा उपमहानगरपालिकामा नयाँ प्रमुख प्रशासकीय अधिकृत आएसँगै जिम्मेवारी हेरफेर भएको छ । उपमहानगरपालिकाको सहरी पूर्वाधार विकास महाशाखा प्रमुखमा सत्यनारायण साह, आर्थिक विकास महाशाखा प्रमुखमा गंगा कुमारी चौलागाई, आर्थिक प्रशासन महाशाखा प्रमुखमा मनोज सुवेदीलाई जिम्मेवारी दिइएको छ ।
यसअघि सहरी पूर्वाधार विकास महाशाखाका प्रमुख कृष्णबहादुर अधिकारीको अनिवार्य अवकास भएको हो भने आर्थिक प्रशासन महाशाखा प्रमुख डा. शंकरप्रसाद उपाध्यायले स्वेच्छिक राजिनामा दिनुभएको थियो । आर्थिक विकास महाशाखा प्रमुख बीके महर्जनले पनि स्वेच्छिक राजिनामा दिनुभएको थियो । यस्तै सम्पत्ति व्यवस्थापन शाखामा दुर्गाप्रसाद न्यौपाने, राजश्व शाखामा रामकृष्ण थापा, सहकारी, तथा उद्योग, रोजगार प्रवद्र्धन शाखामा राजन रायलाई जिम्मेवारी दिइएको छ ।
हेटौंडा उपमहानगरपालिकाको प्रमुख प्रशासकीय अधिकृतको रुपमा साउन २२ गते हाजिर हुनुभएका सहसचिव नमराज घिमिरेले साउन २८ गते जिम्मेवारी हेरफेर गर्नुका साथै रिक्त रहेका पदमा पदस्थापन गर्नुभएको हो । नयाँ कार्यकारी अधिकृत आएपछि जिम्मेवारी हेरफेर तथा पदस्थापनको काम भए पनि यो नियमित र स्वभाविक कार्य भएको उल्लेख गर्नुभएको छ । उहाँले जनप्रतिनिधिसँग समन्वय गरेर कर्मचारी प्रशासनले कानूनसम्मत कार्य गर्ने बताउनुभएको छ ।
