हेटौंडाः जिल्ला समन्वय समिति (जिसस) मकवानपुरको पाँचौ जिल्ला सभा आज आइतबार हुँदैछ । जिसस मकवानपुरका प्रमुख रघुनाथ खुलालले जिल्ला समन्वय समितिको आगामी आर्थिक वर्षका लागि नीति तथा कार्यक्रम तथा बजेट अनिवार्य पारित गर्नुपर्ने भएकाले जोखिमको समयमा पनि सभा आयोजना गर्नु परेको बताउनुभयो ।
जिल्ला सभाको सम्पूर्ण तयारी पूरा भएको र तयारीका सन्दर्भमा शनिबार बसेको जिससको बोर्ड बैठकले स्वास्थ्य सम्बन्धी सम्पूर्ण मापदण्डहरु पूरा गरेर जिल्ला सभा आयोजना गर्ने निर्णय गरेको प्रमुख खुलालले जानकारी दिनुभयो । जिसस प्रमुख खुलालको अध्यक्षतामा बसेको बैठकले आइतबारका लागि जिम्मेवारी बाँडफाँट समेत गरेको छ । प्रमुख खुलालका अनुसार स्वास्थ्य सम्बन्धी सम्पूर्ण मापदण्ड एवम् भौतिक दूरी कायम गरेर जिल्ला सभाका सदस्यहरु मात्रको उपस्थितिमा अन्य कार्यक्रमहरु कटौती गरेर सभा आयोजना गर्न लागिएको हो । “हामीले जिल्ला सभाका सदस्यहरु मात्रको उपस्थितिमा अन्य कार्यक्रमहरु कटौती गरेर नीति कार्यक्रम तथा बजेट पास गर्नका लागि मात्र सभा आयोजना गर्न लागेका हौं”, प्रमुख खुलालले भन्नुभयो ।
नेपालको संविधान २०७२ को धारा २२० को उपधारा (७) मा उल्लेख काम, कर्तव्य र अधिकारका बारेमा जिल्ला सभा गर्ने प्रावधानअनुसार जिल्ला सभा आयोजना गर्न लागिएको उहाँले जानकारी दिनुभयो । जिल्ला सभामा जिल्ला समन्वय समिति मकवानपुरले हालसम्म गरेका काम कारवाही तथा आगामी नीति तथा कार्यक्रम पारित गरिने छ । सभामा आगामी नीति, कार्यक्रम सम्बन्धी प्रस्ताव, आर्थिक वर्ष २०७७/७८ को आय तथा व्ययको अनुमान सम्बन्धी प्रस्ताव, आर्थिक वर्ष २०७६/०७७ को संशोधित व्यय विवरण, विनियोजिन तथा प्रगति समिक्षा, आर्थिक वर्ष २०७५/०७६ र त्यसअघिका बेरुजु तथा संपरीक्षण सम्बन्धी प्रतिवेदन र अधिकार प्रत्यायोजन प्रस्ताव पारित गरिने उहाँले बताउनुभयो ।
सभामा मकवानपुरका स्थानीय तहका प्रमुख/उपप्रमुख, अध्यक्ष/उपाध्यक्ष, र जिल्ला सभाका पदाधिकारीहरुको मात्र सहभागिता रहने उहाँले बताउनुभयो । “हामीले जिल्ला सभा भव्य रुपमा आयोजना गर्ने र सभामा जिल्लास्थित सबै संघ/संस्थाहरुलाई सहभागी गराउने योजना हुँदा हुँदै पनि अहिलेको विशेष परिस्थितिका कारण सोँचेअनुसार कार्यक्रम आयोजना गर्न नसकिएको उहाँले बताउनुभयो । जिल्ला सभालाई बागमती प्रदेशका मुख्यमन्त्री डोरमणि पौडेलले सम्बोधन गर्ने कार्यक्रम समेत रहेको प्रमुख खुलालले जानकारी दिनुभएको छ । बैठकमा जिसस उपप्रमुख भगवती पुडासैनी, समन्वय अधिकारी आनन्दराज पोखरेल, जिससका सदस्यहरुलगायत कार्यालयका कर्मचारीहरुको उपस्थिती थियो ।
