हेटौँडा : हेटौँडा हुँदै बीरगन्ज पुगेको मालबाहक ट्रकमा लागूऔषध चरेस बरामद भएको छ । जिल्ला प्रहरी कार्यालय पर्साका अनुसार बुधबार साँझ साढे ७ बजेको समयमा वीरगञ्ज–२१, परवानीपुरचोकमा रोकी राखेको प्रदेश २–०३–००१ ख ६३४८ नम्बरको ट्रकबाट प्रहरीले ३१९ किलो चरेस बरामद गरेको छ ।
मालवाहक ट्रकमा लागूऔषध चरेस लोड गरी ल्याएको भन्ने विशेष सूचनाका आधारमा प्रहरीले आवश्यक कारवाही गरेको जनाएको छ । प्रहरीले ट्रक चालक मकवानपुर जिल्लाको थाहा नगरपालिका–१२ का ३६ वर्षीय बुद्धिबहादुर स्याङ्तानलाई नियन्त्रणमा लिएको छ । ट्रकको पछाडि सामान बोक्ने भागमा सेतो प्लाष्टिकको बोराभित्र लुकाई छिपाई राखिएको अवस्थामा लागूऔषध चरेस १३ पोका बरामद भएको प्रहरीले जानकारी दिएको छ । प्रहरीले चालक बुद्धिबहादुरको साथबाट १ लाख ९२ हजार रुपैयाँ नगद पनि बरामद गरेको छ ।
