हेटौँडा: विविध कारणले अहिले मुलुकको अर्थतन्त्र कमजोर छ । कमजोर अर्थतन्त्रको प्रभाव सर्वत्र छ । कमजोर अर्थतन्त्रकै प्रभावका कारण हेटौँडामा साहित्यिक संस्थाले प्रदान गर्ने सम्मान समेत प्रभावित बनेको छ । महिला साहित्यकारहरुको संस्था आँचल साहित्य कला पुञ्जले अक्षयकोषको व्याजदर घटेर आम्दानी घटेसँगै आँचलले यस वर्ष ५ वटा पुरस्कार स्थगित गर्ने निर्णय गरेको छ ।
हेटौँडा उपमहानगरपालिकाको प्रवर्धनमा यही जेठ १७ गते शनिबार हेटौँडामा हुने ‘बृहत् साँस्कृतिक तथा साहित्यिक कार्यक्रम’ मा पाँच वटा सम्मान स्थगित गरेको आँचलले चार वटा सम्मान प्रदान गर्नेछ । बुधबार हेटौँडामा पत्रकार सम्मेलन गरेर
मङ्गलादेवी श्रेष्ठ बालप्रतिभा पुरस्कार सम्मान २०८१ बाल प्रतिभा अनसुया खनाललाई नगद ३ हजार ५ सय रुपैयाँसहित पुरस्कृत गरिनेछ । मुक्ति–तारा नवप्रतिभा सम्मान २०८१ बाट नवप्रतिभा स्वस्तिका दाहाललाई नगद ५ हजार १ रुपैयाँसहित सम्मान गरिनेछ । यस्तै सुन्तलीमाया श्रेष्ठ युवा प्रतिभा सम्मान २०८१ बाट कवि पुरुषोत्तम आचार्यलाई नगद १० हजार १ रुपैयाँसहित सम्मान गरिनेछ । आँचल सम्मान २०८१ बाट अक्षयकोष संस्थापक प्रकाश लम्साललाई सम्मान गरिनेछ ।
प्रमुख जिल्ला अधिकारी स्किम श्रेष्ठको प्रमुख आतिथ्य रहने कार्यक्रममा ‘बालबालिका अभिभावक र आजको समाज’ विषयक मनोपरामर्श कार्यक्रम आयोजना गरिएको छ । सो कार्यक्रममा प्राध्यापक तथा मामाघर नेपालका संस्थापक अर्पण पराजुलीले परामर्शदाताको रूपमा सहजीकरण गर्नुहुनेछ । कार्यक्रममा महिला बालबालिका तथा समावेशीकरण महाशाखा प्रमुख विष्णुकुमारी लामिछाने, सिविन बाल हेल्प लाइनका जिल्ला प्रमुख झविन्द्र ज्ञवाली र श्यामकृष्ण श्रेष्ठ ‘डिजिटल स्क्रिनको प्रभाव’ विषयक बहसमा सहभागी हुनुहुनेछ ।
कार्यक्रममा कक्षा ८–१२ तहस्तरीय कविता प्रतियोगितामा समेत हुनेछ । प्राप्त भएका कविताहरूमध्ये उत्कृष्ट १० छनौट गरी कविहरूको रचना वाचन गर्ने र प्रथम, द्वितीय, तृतीय तथा सान्त्वना स्थान प्राप्त कवितालाई पुरस्कृत गरिनेछ । पुरस्कारहरू सोही अनुसार क्रमशः १० हजार, ७ हजार, ४ हजार र १ हजार रहनेछन् । कार्यक्रममा साहित्यकार निमेष निखिलको ‘कि नोट स्पिच’ प्रस्तुत हुने तथा मकवानपुर जिल्लाका विभिन्न साहित्यिक स्रष्टाका रचना समेत वाचन हुने अध्यक्ष सापकोटाले जानकारी दिनुभएको छ ।
महिलाहरूको क्रियाशील संस्था आँचल साहित्य कला पुञ्ज मकवानपुर २०६९ सालमा स्थापना भएको हो भने संस्थाले विभिन्न साहित्यिक गतिविधिहरू सञ्चालन गर्दै आइरहेको छ ।
