हेटौँडा ः मकवानपुर प्रहरीले लागूऔषध गाँजासहित बोलेरो गाडीलाई नियन्त्रणमा लिएको छ । बिहीबार बिहान ७ बजेको समयमा मकवानपुरको कैलाश गाउँपालिकाबाट मनहरी गाउँपालिकातर्फ आउँदै गरेको बा १० च ७७५८ नम्वरको बोलेरो गाडीबाट २ सय १२ किलोग्राम लागूऔषध गाँजा बरामद गरेको हो ।
ईलाका प्रहरी कार्यालय मनहरीबाट खटिएको प्रहरी टोलीले राक्सिराङ गाउँपालिका–५, चैनपूरमा बोलेरो पिक गाडीलाई नियन्त्रणमा लिएको हो । प्रहरीकाअनुसार बोलेरोमा सवार २ जना भने प्रहरीलाई देखेपछि गाडी छाडेर फरार भएका छन् । फरार भएका दुईजनालाई प्रहरीले पक्राउ गर्न सकेन । फरार भएका व्यक्तिको खोजी भइरहेको प्रहरीले जानकारी दिएको छ ।
