हेटौंडाः बागमती प्रदेशका युवा तथा खेलकुदमन्त्री मीनकृष्ण महर्जनले स्रोत साधनको अभावका बिच युवा तथा खेलकुद क्षेत्रको योजनाहरु सञ्चालन गर्नुपरेको गुनासो गर्नुभएको छ । मन्त्रालयको बजेट न्यून रहेकाले युवा तथा खेलकुद क्षेत्रमा पर्याप्त मात्रामा पूर्वाधार निर्माण तथा व्यवस्थापनका काम अघि बढाउन नसकेको उहाँले बताउनुभएको हो ।
युवा तथा खेलकुद मन्त्रालयको आर्थिक वर्ष २०८१/०८२ को प्रथम त्रैमासिक अवधिको प्रगति समीक्षा बैठकलाई सम्बोधन गर्दै मन्त्री महर्जनले बजेटको सिमितताका कारण अपेक्षाकृत उपलब्धी प्राप्त गर्न कठिन भएको बताउनुभयो । आफू मन्त्री नियुक्त हुँदा बजेट बनिसकेको र सो बजेट निकै न्यून भएका कारण काम गर्न कठिनाई भइरहेको उहाँको भनाइ छ ।
‘मैले चाहेको भए अन्य विकासे मन्त्रालय पनि लिन सक्थेँ । तर, म खेल क्षेत्रबाट आएको मानिस युवा र खेलाडीको भावना बुझ्न सक्छु । खेलकुद मन्त्रालय कसरी चलाउने भन्ने विषयमा मलाई राम्रो ज्ञान छ’, मन्त्री महर्जनले भन्नुभयो– ‘तर, म मन्त्री नियुक्त हुँदा बजेट बनिसकेको थियो, जुन अत्यन्तै न्यून छ । त्यसकारण सोचे अनुसारको काम गर्न सकिएको छैन ।’ उहाँले बजेट वृद्धि गर्न प्रदेश सरकारसँग नियमित रुपमा पहल भइरहेको बताउनुभयो ।
मन्त्रालय मातहतका कार्यालयले सञ्चालन गर्दै आइरहेको आयोजनाहरुलाई पूर्णता दिन पहल गर्ने प्रतिबद्धतासमेत मन्त्री महर्जनले व्यक्त गर्नुभयो । उहाँले कार्यालय प्रमुखहरुलाई उच्च मनोबलसहित काम गर्न निर्देशनसमेत दिनुभयो । देखिने, सुनिने र नागरिकले अनुभूत गर्ने गरी उत्प्रेरित भएर काम गर्न तथा आगामी दिनमा मन्त्रालयको वार्षिक कार्ययोजना बमोजिम नतिजा हासिल गर्नेतर्फ अग्रसर हुन उहाँले निर्देशन दिनुभएको हो । मन्त्री महर्जनले प्रभावकारीरुपमा कार्यसम्पादन गर्न तथा उपयुक्त ढंगका योजनाहरु तयार गर्न निर्देशन दिनुभयो ।
बैठकमा प्रदेश खेलकुद विकास परिषद्का सदस्यसचिव दीपक लामाले खेलकुद क्षेत्रको विकास एवम् विस्तारका लागि परिषद्बाट छोटो समयमा उल्लेख्य प्रयास भएको बताउनुभयो । उहाँले राज्यले खेलकुदको विषय पाठ्यक्रममा नै समावेश गरेर अगाडि बढ्नुपर्नेमा जोड दिनुभयो ।
प्रदेश युवा परिषद्का कार्यकारी उपाध्यक्ष सन्तोष चौलागाईंले परिषद्बाट सञ्चालन भइरहेका युवा लक्षित कार्यक्रमबारे जानकारी गराउनुभयो । तथ्यांक व्यवस्थापन नहुँदा तालिम कार्यक्रम सञ्चालन गर्न केही कठिनाई भएको भन्दै त्यसतर्फ सरकारले सहयोग गर्नुपर्ने उहाँले बताउनुभयो ।
कार्यक्रममा सामाजिक विकास कार्यालय काभ्रेपलाञ्चोक, ललितपुर र मकवानपुरका कार्यालय प्रमुखहरुले सञ्चालित आयोजनाको भौतिक एवम् वित्तीय प्रगतिबारे जानकारी गराएका थिए । उनीहरुले मन्त्रालय र अन्तर्गतका निकायहरुको त्रैमासिक प्रगतिका साथै आयोजनाहरुकोे वित्तीय एवम् भौतिक प्रगतिको अवस्था, कार्यान्वयनमा आइपरेका समस्या तथा चुनौती र समाधानका लागि गरिएका प्रयासहरुबारे प्रस्तुतिकरण गरेका थिए ।
