हेटौँडाः यही मंसिर १६ मा हुने स्थानीय तह उपनिर्वाचनमा हेटौंडा उपमहानगरपालिका वडा नम्बर–१२ को वडा अध्यक्ष पदका लागि नेपाली कांग्रेसका उम्मेदवारले मनोनयन दर्ता गरेका छन् । २०७९ को निर्वाचनमा निकटतम प्रतिद्वन्द्वी रहनुभएका कांग्रेसका अर्जुन प्रसाद तिवारीले उम्मेदवारी दर्ता गराउनु भएको हो ।
तिवारीले सुदर्शन प्रसाद लामाको प्रस्ताव र सरन बहादुर घलेको समर्थनमा उम्मेदवारी दर्ता गराउनु भएको हो। तिवारी २०७९ को निर्वाचनमा माओवादी केन्द्रका उम्मेदवार ललित घलानसँग ३१ मतको अन्तरले पराजित हुनुभएको थियो। २०७९ मा भएको निर्वाचनमा तिवारीले १ हजार ३४० मत पाउनुभएको थियो।
तिवारी २०७४ को निर्वाचनमा समेत निकटतम प्रतिद्वन्द्वी रहनुभएको थियो। २०७४ को निर्वाचनमा पनि घलानले चुनाव जित्दा तिवारी दोस्रो स्थानमा रहनुभएको थियो ।
