हेटौँडाः वागमती प्रदेशको प्रमुख प्रतिपक्षी दल नेकपा माओवादी केन्द्रले सरकारको सय दिने कामकारबाहीप्रति असन्तुष्टि जनाउँदै मूख्यमन्त्री बहादुरसिंह लामालाई ज्ञापनपत्र बुझाएको छ ।
हेटौँडास्थित कार्यालयमा बुधबार मूख्यमन्त्री कार्यालय, पूर्व मूख्यमन्त्री तथा वागमती प्रदेशसभा सदस्य शालिकराम जम्मकट्टेल, प्रेमबहादुर पुलामी छिन्तु, कुमारी घिसिङ लगायतका प्रदेश सभा सदस्यहरुले विभिन्न ८ बुँदे माग राखी ज्ञापनपत्र बुझाएका हुन् ।
बागमती प्रदेश सरकार जनताको भावना विपरित स्वेच्छाचारी ढंगले चलेको उहाँले आरोप लगाउनुभयो । सरकारको सय दिन अर्थात आर्थिक वर्षको पहिलो त्रैमासिक प्रगति ६.५ प्रतिशत मात्रै हुनुले सरकार आफ्नो काममा केन्द्रित नभएको माओवादीको ठम्याई छ । उसले सरकारलाई नबरालिन र आफ्नो कर्तव्यमा केन्द्रित भई प्रदेश र प्रदेशवासीको हितमा काम गर्न गम्भीर ध्यानाकर्षण पनि गराएको छ । माओवादीले वर्तमान गठबन्धनको सरकारको कामप्रति जनता चरम निराशामा परेको उल्लेख गर्दै युवापंक्ती दिनानुदिन विदेशिने दर बढिरहेको भन्दै चिन्ता पनि व्यक्त गरेको छ ।
माओवादीले गत असोज ११ र १२ गते आएको वर्षा र बाढिपहिरोबाट प्रदेशमा धेरै धनजनको क्षति भएको र उद्दार, राहत र पूनर्निर्माणका सवालमा भएको सर्वदलीय सहमति कार्यान्वयन नभएकोले उक्त निर्णयको कार्यान्वयन, योजनाबद्ध विकास निर्माण, सेवा प्रवाह, सहकारी समस्या लगायतका महत्वपूर्ण मागहरु समावेश गरी सरकारलाई ज्ञापनपत्र बुझाएको उल्लेख गरेको छ ।
