हेटौंडाः मकवानपुरमा आर्थिक वर्ष २०८०/८१ मा सम्पादित स्वास्थ्य कार्यक्रमहरुको जिल्लास्तरीय वार्षिक समीक्षा भएको छ । जनस्वास्थ्य कार्यालय मकवानपुरको आयोजनामा मंगलबार र बुधबार दुई दिन एक वर्षभित्र भएका सम्पादित कार्यक्रमहरुको समीक्षा भएको हो ।
जिल्लाभित्रका १० वटै स्थानीय तहका स्वास्थ्य शाखाका प्रमुख, जिल्लाभित्रका गैरसरकारी संस्था र निजी अस्पतालका प्रमुखहरुको सहभागितामा समीक्षा भएको छ । जनस्वास्थ्य कार्यालय मकवानपुरका सूुचना अधिकारी लक्ष्मण घिमिरेले कार्यालयबाट भएका कार्यक्रमको प्रस्तुति राख्नुभयो । गत आर्थिक वर्षमा कार्यालयले ९५ करोड २७ लाख ८६ हजार रुपैयाँ विनियोजित बजेटमध्ये ७० प्रतिशत खर्च गरेको छ भने भौतिक प्रगति ९० प्रतिशत भएको छ ।
सूचना अधिकारी घिमिरेका अनुसार कार्यालयमा १० पटक जनस्वास्थ्य समन्वय समितिको बैठक बसेको छ भने १२ पटक बजार अनुगमन गरेको छ । यस्तै, स्थानीय तह तथा जिल्लास्तरीय महामारी प्रतिकार्य तथा पूर्वतयारी योजना निर्माण तथा सहजीकरण ११ पटक, मानसिक तालिम २५, विद्यालय स्वास्थ्य शिक्षा कार्यक्रम २ सय ५ र क्षयरोग पुनर्ताजगी तालिम २३ पटक सञ्चालन गरेको छ ।
गत वर्षमा जिल्लाभित्र ३१ हजार ७ सय ५४ बालबालिकालाई दादुरा खोप लगाइएको छ । लक्ष्यको ९९ प्रतिशत खोप लगाइएको हो । सबैभन्दा बढी हेटौंडा उपमहानगरपालिकामा १२ हजार ८ सय ६५ जना, मनहरी गाउँपालिकामा ३ हजार १ सय १५, थाहा नगरपालिकामा २ हजार ५ सय १८ जना र सबैभन्दा कम इन्द्रसरोवर गाउँपालिकामा ७ सय ८४ जना बालबालिकालाई दादुराविरुद्धको खोप लगाइएको छ ।
जिल्लाभित्र ८ हजार ७ सय ७ जनाको क्षयरोग जाँच गर्दा ३ सय २ जनामा पोजेटिभ नतिजा आएको थियो । जिल्लाभित्र चालु आर्थिक वर्षको साउनदेखि असोज ७ गतेसम्म ६ सय १२ जनामा डेङ्गु संक्रमण पुष्टि भएको छ । कार्यालयले डिजिटल एक्सरेमार्फत् भीमफेदी गाउँपालिकास्थित कारागारमा नौ सय २५ जनाको स्वास्थ्य परीक्षण गर्दा आठ जना नयाँ क्षयरोगी भेटिएका थिए । यस्तै, डिजिटल एक्सरेमार्फत् मनहरी गाउँपालिकामा पाँच सय ६४ जनाको स्वास्थ्य परीक्षण गर्दा १५ जना नयाँ क्षयरोगी भेटिएका छन् ।
समीक्षाको अवसरमा वार्षिक कार्यसम्पादनका आधारमा पालिका र स्वास्थ्यकर्मीलाई सम्मान समेत गरिएको छ । जनस्वास्थ्य कार्यालय मकवानपुरका प्रमुख कृष्णबहादुर मिजारको सभाध्यक्ष तथा बागमती प्रदेशका स्वास्थ्यमन्त्री किरण थापा मगरको प्रमुख आतिथ्यमा कार्यक्रम भएको हो । कार्यक्रममा बागमती प्रदेश स्वास्थ्य आपूर्ति व्यवस्थापन केन्द्रका निर्देशक बसन्त अधिकारी, स्वास्थ्य मन्त्रालयका महाशाखा प्रमुख डा. खगेश्वर गेलाल, प्रदेश स्वास्थ्य निर्देशनालयका शाखा प्रमुख डा. नवीन दर्नाल र हेटौंडा अस्पतालका मेडिकल सुपरिटेण्डेन्ट डा. रामचन्द्र सापकोटालगायतको आतिथ्य रहेको थियो ।
