हेटौंडाः बागमती प्रदेशका मुख्यमन्त्री बहादुर सिंह लामाले सरकारको नेतृत्व लिएको एक महिना पूरा भएको छ । लामाको नेतृत्वमा नेपाली कांग्रेसले पहिलो पटक बागमती प्रदेश सरकार सञ्चालनको बागडोर सम्हालेको हो ।
यस अवधिमा मुख्यमन्त्री लामा नेतृत्वको सरकारले ३ वटा क्याविनेट बैठक सम्पन्न गरेको छ । उक्त क्याविनेटबाट मुख्यमन्त्री लामाले खासै महत्वपूर्ण निर्णय गर्न सक्नुभएको छैन । मुख्यमन्त्री लामाको एक महिना अवधि व्यवस्थापकीय भूमिकामा व्यतित भएको देखिन्छ ।
गत साउन ८ गते प्रदेश सरकारको मुख्यमन्त्रीमा नियुक्त हुनु भएका लामाले साउन ९ मा शपथग्रहण गर्नुभयो । उहाँले शपथग्रहण गरेकै दिन विना विभागीय ३ सहित ९ मन्त्रीलाई नियुक्त गरेर क्याविनेट बैठकसमेत सञ्चालन गर्नुभएको थिए । उक्त बैठकले १३ जिल्ला समन्वय समितिलाई ५ करोड ३० लाख रुपैयाँ कार्यक्रममार्फत् आर्थिक सहायता रकम उपलब्ध गराउने निर्णय गरेको थियो ।
सकसपूर्ण रुपमा मन्त्रिपरिषद्लाई साउन १२ गते १३ मन्त्रालयमा एक विना विभागीयसहित १४ मन्त्री नियुक्त गरेर पूर्णता दिनुभएका मुख्यमन्त्री लामाले साउन १३ मा मन्त्रिपरिषद् बैठक राखेर एउटामात्र निर्णय गर्नुभएको थियो । सो बैठकबाट उहाँले प्रमुख राजनीतिक सल्लाहकारमा विनोद शाहलाई नियुक्त गर्ने निर्णय गर्नुभएको थियो ।
सोपश्चात् विभिन्न कार्यक्रम र उद्घाटनमा सक्रिय रहनु भएका मुख्यमन्त्री लामा मन्त्रालय र मन्त्रिपरिषद् व्यवस्थापनमा केन्द्रित हुनुभयो । मुख्यमन्त्री लामासहित विभागीय मन्त्रीहरु निर्वाचन र जिल्ला केन्द्रित भए । कार्यक्रम र निर्वाचन क्षेत्रमा बधाई तथा धन्यवाद ज्ञापनका लागि मुख्यमन्त्री लामा र मन्त्रीहरु व्यस्त हुँदा न क्याविनेट बस्न सक्यो, न नै कुनै ठोस काम कारवाही अघि बढ्यो ।
दोस्रो क्याविनेट बसेको १८ दिनपछि मुख्यमन्त्री लामाले तेस्रो बैठक आह्वान गर्नुभयो । साउन ३२ गते बसेको उक्त क्याविनेट बैठकले पनि महत्वपूर्ण निर्णय गर्न सकेन । सो बैठकले सरकारको प्रवक्तामा प्रदेशका आन्तरिक मामिला तथा कानुनमन्त्री सुरजचन्द्र लामिछानेलाई तोक्ने, प्रदेश सरकारका निकायहरुमा रहेका अस्थायी दरबन्दी स्वीकृत गर्ने र गाईजात्राको अवसरमा प्रदेशभर सार्वजनिक विदा दिने निर्णय गरेको थियो ।
सोबाहेक मुख्यमन्त्री लामाले एक महिनाको अवधिमा महत्वपूर्ण र नागरिक लक्षित योजना तथा कार्यक्रम र निर्णय गर्न सक्नुभएको छैन । आम नागरिकहरुमा कांग्रेस नेतृत्वको सरकारबाट महत्वपूर्ण निर्णय र काम हुने अपेक्षा हुनु स्वभाविक नै हो । कांग्रेसका नेता तथा सांसदहरु नै कांग्रेस नेतृत्वको सरकारले नागरिकलाई लक्षित गरेर काम गर्ने बताउँदै आएका थिए । तर, सरकारको पहिलो महिनाको गति हेर्दा प्रगति अपेक्षाकृत हुने देखिएको छैन ।
सिस्टम बनाउन र व्यवस्थित गर्न सरकार सक्रिय छः मुख्यमन्त्री लामा
मुख्यमन्त्री लामाका अनुसार सरकारले सिस्टम निर्माण तथा व्यवस्थापनमा जोड दिने काम गरिरहेको छ । सरकारका काम तत्काल नदेखिने र क्रमिकरुपमा प्रभाव पर्ने उहाँले बताउनुभयो ।
सरकारले एक महिनामा नै के गर्यो गरेन लेखाजोखा गर्ने समय नभएको उहाँको भनाइ छ । सरकारले १०० दिनको उपलब्धी लक्षित गरेर काम अघि बढाएको उहाँले बताउनुभयो । सरकारको दिशा र गति निश्चित गर्न प्रयत्न भइरहेको उहाँले बताउनुभएको हो ।
‘हामीले अहिले नै यो गर्यौं भनेर लेखाजोखा गर्ने बेला भएको छैन । विशेषगी १०० दिनको लक्ष्यमा काम गर्ने प्रक्रिया छ । त्यसमा ठोस कामहरु देखिन्छ । अहिले व्यवस्थापन र सिस्टम बनाउने काममा सक्रिय रहेका छौं ।’ मुख्यमन्त्री लामाले भन्नुभयो, ‘म नेतृत्वमा आएपछि पहिले सरकारलाई पूर्णता दिने काम भयो । मन्त्रिपरिषद्लाई पूर्णता दिन निकै सकस भयो ।’
उहाँका अनुसार कर्मचारी बढुवा, सरुवा तथा पदस्थापनलाई व्यस्थापन गर्नका लागि पनि केही कामहरु टुंग्याइएको छ । कर्मचारीहरुको समस्याले सरकारलाई जटिलता हुने भएकाले प्राथमिकताका साथ काम गरिएको उहाँले बताउनुभयो । मन्त्रिपरिषद् बैठक बसेर अत्यावश्यक र महत्वपूर्ण निर्णय भएको मुख्यमन्त्री लामाले बताउनुभयो ।
मुख्यमन्त्री लामाका अनुसार राजनीतिक सल्लाहकार, प्रवक्ता तोक्ने तथा जिल्लाको मोनिटरिङ गर्ने निकाय समन्वय समितिलाई आर्थिक सहयोग उपलब्ध गराउने र सेवा प्रवाहलाई चुस्तदुरुस्त राख्न अस्थायी दरबन्दी स्वीकृत गर्ने काम भएको छ । अस्थायी दरबन्दी स्वीकृतिबाट नागरिकहरुसँग प्रत्यक्ष सरोकार राख्ने शिक्षा, स्वास्थ्य तथा सेवा प्रवाहको लागि सहजता हुने गरी सरकारले काम गरेको उहाँले दावी गर्नुभयो ।
एक महिनाको अवधिमा सरकारको कामलाई व्यवस्थित गर्न विभागीय मन्त्री र सचिवहरुसँग करार सम्झौता गर्ने कार्य सम्पन्न गरिएको उहाँले बताउनुभयो । कार्ययोजना र निर्धारित समयमा नै काम गर्न उक्त करार महत्वपूर्ण रहनेछ भने आगामी एक महिनाभित्र बजेट कार्यक्रम कार्यान्वयनका लागि कार्यविधि निर्माण गर्न निर्देशन गरिएको उहाँले बताउनुभयो ।
मुख्यमन्त्री लामाका अनुसार सरकारको नेतृत्व लिएलगत्तै विभागीय मन्त्रालयलाई एक/एक वटा ठोस काम गर्न र सोहीअनुसार योजना तयार गर्न निर्देशन गरिएको छ । यसले प्रदेशमा एक वर्षमा १२ वटा मन्त्रालयबाट नागरिकहरुसँग जोडिएर उपलब्धीसहित काम गर्नसक्ने उहाँले बताउनुभयो ।
‘सबैले सुन्ने अनि चिन्ने गरी एक÷एक वटा ठोस काम गर्न १२ वटै मन्त्रालयलाई निर्देशन भइसकेको छ । विपद् व्यवस्थापनको विषयमा सरकार गम्भिरताका साथ अघि बढेको छ । विपद् प्रभावित नागरिकका लागि के–के गर्न सकिन्छ भनेर सरकार अघि बढेको छ । आवश्यकताका आधारमा विकास र व्यवस्थापनको काम प्रदेश सरकारले गरिरहेको छ । सरकारले विगतको कमीकमजोरी अध्ययन गरिसकेको र त्यसलाई सुधार गरेर अघि बढ्ने तयारीमा रहेको छ । एक महिनाको अवधिमा धेरै कामहरु सुरु भएको छ । त्यसका उपलब्धीहरु क्रमिक रुपमा देखिन्छ ।’ मुख्यमन्त्री लामाले भन्नुभयो ।
विकट क्षेत्रलाई मध्यनजर गर्दै विभिन्न कार्यालयहरुको सेवाकेन्द्र कार्यालयहरु खोलेर लक्षित वर्गलाई सेवा प्रवाह गर्ने गरी अघि बढेको मुख्यमन्त्री लामाले बताउनुभयो । कानुनअनुकूल बनाएर समस्या हल गर्ने गरी सरकारले आन्तरिक योजना तथा तयारीको काम गरेर कार्यान्वयनमा अघि बढेको उहाँले बताउनुभयो । व्यवस्थापकीय भूमिकाका लागि केही समय लाग्ने भएकाले अहिले नै तुरुन्त काम नदेखिने उहाँको भनाइ छ ।
नागरिकहरुले नकारात्मकमात्र नभई सकारात्मक पाटो पनि सोच्न जरुरी रहेको उहाँले बताउनुभयो । सेवा प्रवाह र विकासका काम अघि बढाउन कार्यालय र संरचनाहरु व्यवस्थित गर्न जरुरी रहेको उहाँले बताउनुभयो । सरकारले अहिले कार्यालय र संरचनाहरु व्यवस्थापनमा काम गरिरहेको उहाँको भनाइ छ । सार्वजनिक सेवा सुधार र सुशासनका लागि प्रदेश सरकारले व्यवस्थापकीय क्षेत्रमा परिवर्तन गर्नेगरी योजना बनाएर लगानी गरेको मुख्यमन्त्री लामाले बताउनुभयो ।
सरकारले गरेका व्यवस्थापनका कामहरु केही दिनमा नै क्रियाशील भएर उपलब्धी प्राप्त हुने उहाँले बताउनुभयो । सरकारले हेरक निकायको मोनिटरिङ गरेर सेवा र विकासलाई गुणस्तरीय बनाउने लक्ष्यसहित काम गरिरहेको उहाँले बताउनुभयो । उहाँले प्रदेश सरकारको १०० दिनको उपलब्धी महत्वपूर्ण हुने बताउनुभयो । राजनीतिकरुपमा केही विषयहरु पेचिलो भएकाले गठबन्धनको सरकार भएकाले सबैसँग छलफल गरेर अघि बढ्नुपर्ने बाध्यता रहेको उहाँले बताउनुभयो ।
