हेटौँडाः हेटौँडा उपमहानगरपालिकाले राजश्वको दरमा उच्च वृद्धि गरेको विरोधमा मकवानपुर उद्योग वाणिज्य संघले आन्दोलनको कार्यक्रम तय गर्न अहिले बैठक बसिरहेको छ । आज साँझ साढे ५ बजेदेखि संघको कार्यालयमा बैठक सुरु भएको छ । बैठकअघि संघका अध्यक्ष कृष्ण कुमार गुप्ताको नेतृत्वमा संघका पदाधिकारीले हेटौँडा उपमहानगरपालिकाका प्रमुख प्रशासकीय अधिकृत सूर्यप्रसाद गौतमलाई राजश्व वृद्धिको प्रक्रियाको चरणवद्ध निर्णयको प्रतिलिपि माग गर्दै पत्र बुझाएको छ ।
राजश्व परामर्श समितिका सदस्य, नगर कार्यपालिकाका सदस्य, नगर सभाका सदस्य समेतले राजश्व वृद्धिको विषयमा कुनै ठोस छलफल र निर्णय नभएको भनी स्पष्टीकरण सार्वजनिक गरेसँगै व्यवसायीले कानुनीरुपमा राजश्व वृद्धि भए, नभएको बुझ्ने निर्णयको प्रतिलिपि नै माग गरेको हो । मकवानपुर उद्योग वाणिज्य संघले कानुनी उपचारसँगै आन्दोलनका कार्यक्रम तय गर्न बैठक बोलाएको अध्यक्ष कृष्ण कुमार गुप्ताले जानकारी दिनुभएको छ ।
मकवानपुर उद्योग वाणिज्य संघले निर्माण व्यवसायी संघ मकवानपुरसँगै संघ मातहतका बस्तुगत संघलाई समेत परिचालन गरेर आन्दोलन गर्ने तयारी गरेको छ । यसअघि निर्माण व्यवसायी संघ मकवानपुरको शनिबार बिहान बसेको बैठकले आन्दोलन गर्ने निर्णय गरिसकेको छ । निर्माण व्यवसायी संघले आइतबार पत्रकार सम्मेलन गरेर आन्दोलनको घोषणा गनर्ने तयारी गरे पनि मकवानपुर उद्योग वाणिज्य संघको बैठक बस्न ढिलाई भएको छ ।
हाम्रो नजिकको, साझेदारी गरेर अगाडि बढ्नुपर्ने स्थानीय सरकारको विरुद्धमा आन्दोलन गर्नु सामान्य विषय नभएको र आन्दोलन घोषणापछि पछाडि फर्कनु चुनौतिपूर्ण हुने भएकोले कार्यसमितिका सबै सदस्यको सल्लाह, सुझाव लिएर व्यवस्थित ढंगबाट आन्दोलनको घोषणा गर्ने तयारी भएकोले केही ढिलाई भएको अध्यक्ष गुप्ताले बताउनुभएको छ । आन्दोलनका प्रभावकारी कार्यक्रम तय गरेर अगाडि बढ्ने उहाँले स्पष्ट पार्नुभएको छ ।
