हेटौँडाः मकवानपुर उद्योग वाणिज्य संघले हेटौँडा उपमहानगरपालिकासँग चालु आर्थिक वर्षका लागि राजश्वको दर वृद्धि गर्ने प्रक्रियाको चरणवद्ध निर्णय माग गरेको छ । राजश्व परामर्श समिति, कार्यपालिका र नगरसभा तीनै चरणमा राजश्व वृद्धि गर्ने निर्णयको प्रति दिन माग गरेको हो । आइतबार दिनको ४ बजेको समयमा हेटौँडा उपमहानगरपालिकाका प्रमुख प्रशासकीय अधिकृत सूर्यप्रसाद गौतमलाई राजश्वको दर वृद्धि गर्ने प्रक्रियाको चरणवद्ध निर्णय माग गर्दै पत्र बुझाएको छ ।
मकवानपुर उद्योग वाणिज्य संघका अध्यक्ष कृष्ण कुमार गुप्ता, वरिष्ठ उपाध्यक्ष अनिल अग्रवाल, उपाध्यक्ष प्रमोदसिंह रानाभाट, उज्ज्वल चौलागाई, महासचिव दीपक उप्रेती, सदस्यहरु कुलप्रसाद चौलागाई र सन्तोष अर्यालको समूह उपमहानगरपालिकाको कार्यालय पुगेर प्रमुख प्रशासकीय अधिकृत गौतमलाई पत्र बुझाएका छन् । हेटौँडा उपमहानगरपालिकाले करको दर उच्च बढाएको भन्दै व्यवसायीहरु आन्दोलनको तयारीमा समेत छन् । आइतबार कानुन व्यवसायीसँगको परामर्श पछि मकवानपुर उद्योग वाणिज्य संघले करवृद्धि गर्ने प्रक्रियाअन्तर्गत विभिन्न चरणको निर्णय माग गरेको हो ।
नगरसभा सदस्य र कार्यपालिका सदस्यहरुले समेत राजश्वको दर वृद्धि गर्ने विषयमा स्पष्ट छलफल नभएको भनी स्पष्ट पारिरहेका बेला संघले उपमहानगरपालिकासँग राजश्व वृद्धि गर्ने प्रक्रियाको चरणवद्ध निर्णय माग गरेको हो ।
