हेटौंडाः बागमती प्रदेश सरकारका श्रम, रोजगार तथा यातायात मन्त्री लक्ष्मण लम्सालले आफ्नो कार्यकालमा भएका प्रगति सार्वजनिक गर्नुभएको छ । आइतबार बिहान पत्रकार सम्मेलनको आयोजना गर्दै मन्त्री लम्सालले १ वर्ष २ महिनामा मन्त्रालयबाट भएका प्रगति विवरण सार्वजनिक गर्नुभएको हो ।
२०८० जेठ ७ देखि २०८१ साउन ६ गतेसम्म आफूले मन्त्रालय सम्हालेदेखि उल्लेख्य काम गरेको उहाँले दाबी गर्नुभएको छ । श्रम, रोजगार तथा यातायात मन्त्रालय भएपनि अधिकार क्षेत्र र संवैधानिक अधिकार श्रम, रोजगारमा नरहेको अवस्थामा पनि आफूले धेरै प्रयन्त गरेको उहाँले बताउनुभयो । नीति निर्माणको काम, कामको क्षेत्रको खोजी र विकासमा प्रदेशलाई अघि बढाउने कोसिस गरेको उहाँले दाबी गर्नुभयो । प्रदेशको अधिकार क्षेत्र मिचिने कानुनविरुद्ध संघीय सरकारसँग संवैधानिक बहस सुरु गरेको उहाँले बताउनुभयो ।
मन्त्री लम्सालले आफूले यातायात मन्त्रालय जिम्मा लिएपछि महत्वपूर्ण नीतिगत सुधार, कार्यालयहरू व्यवस्थित, सेवाहरू प्रविधिमैत्री, जनगुनासोको सम्बोधन, सरोकारवालासँग विभिन्न चरणमा छलफल गरेको बताउनुभएको छ । उहाँले आफूले यातायात व्यवस्था विभागबाट इडिएल सिस्टम प्रदेश सरकार मातहत ल्याई जनअपेक्षाअनुसार छिटो छरितो र प्रभावकारी सेवा प्रवाह गर्ने व्यवस्था मिलाउन उक्त प्रविधिमा पहुँचको सुनिश्चितता र स्पेसिफिकेसन प्राप्त भई प्रिन्टिङ मेसिन र स्मार्टकार्ड खरिद प्रक्रिया अगाडि बढाउने अवस्था तयार गरिएको बताउनुभयो ।
मन्त्रालयअन्तर्गतका यातायात व्यवस्था कार्यालयहरूमा रहेको सवारी साधनहरूको अभिलेखलाई डिजिटाइजेशन तथा आर्केभिड गर्ने कार्यको पूर्वाधार तयार भई कार्य प्रारम्भ गर्ने अवस्था तयार गरिएको उहाँले बताउनुभयो । सार्वजनिक सवारी साधनको पटके इजाजत लिने कार्यलाई अनलाइन पद्धतिबाट सुरु गरिएको र राइड सेयरिङ सेवा सञ्चालन कार्यविधि र विद्युतीय सार्वजनिक सवारी साधन सञ्चालनसम्बन्धी मापदण्ड तयार गरी स्वीकृतिका लागि प्रदेश सरकार (मन्त्रिपरिषद्) मा पेश गरिएको र बागमती प्रदेशको श्रम तथा रोजगार नीति २०८० जारी गरिएकोजस्ता महत्वपूर्ण काम भएको बताउनुभयो ।
