हेटौँडाः हेटौँडा उपमहानगरपालिकाका दुईवटा नगर अस्पतालमा फेरि डाक्टर (मेडिकल अधिकृत) पुगेका छन् । बुधबार हेटौँडा–१३, पदमपोखरीस्थित पदमपोखरी अस्पतालमा २६ बर्षीया डा. गजल पन्त र हेटौँडा–१६, हटियास्थित हटिया अस्पतालमा २८ बर्षीय डा. नरेन्द्र केसी पुगेर सेवा सुरु गर्नुभएको हो ।
गत फागुन महिनामा हटिया अस्पतालका डा. कमलराज न्यौपाने र गत जेठमा पदमपोखरी अस्पतालका डा. निशान अर्यालले राजिनामा दिनुभएपछि हेटौँडा उपमहानगरपालिका मातहतका दुबै अस्पताल डाक्टरबिहिन बनेको थियो ।
हेटौँडा उपमहानगरपालिकाले दुबैजना डाक्टरलाई मंगलबार नियुक्तिपत्र प्रदान गर्दै मंगलबारबाटै नगर अस्पतालमा खटाएको छ । डा. पन्तले यसअघि रक्सिराङ गाउँपालिकाको आधारभूत अस्पतालमा सेवा प्रदान गर्नु भएको थियो । यस्तै, डा. केसीले यसअघि हेटौँडा अस्पताल र निको अस्पतालको इमर्जेसी विभागमा रहेर काम गर्नुभएको थियो । डा. पन्तसँगै पदमपोखरी अस्पतालमा एक जना स्वास्थ्यकर्मी र एक जना स्टाफ नर्स नियुक्त हुनुभएको छ भने डा. केसीसँगै हटिया अस्पतालमा एक जना स्टाफ नर्स नियुक्त हुनु भएको छ ।
हेटौँडा उपमहानगरपालिकाले दुई जना डाक्टरका लागि दरखास्त आव्हान गर्दा १० जनाले आवेदन दिएका थिए । आवेदन दिएका मध्ये ६ जना मात्रै परीक्षामा सहभागी भएका थिए । लिखित परीक्षामा ४ जना मात्रै उत्तीर्ण भएको हेटौँडा उपमहानगरपालिकाको सामान्य प्रशासन शाखाका प्रमुख लक्ष्मण मैनालीले जानकारी दिनुभयो ।
डाक्टर पुगेको दिन मंगलबार पदमपोखरी अस्पतालमा १५ जना सेवाग्राहीले सेवा लिएका छन् । बुधबार हटिया अस्पतालमा ४१ जनाले सेवा प्राप्त गरेका छन् । डा. केसीले अस्पतालमा सबै साधन प्राप्त भएमा बिरामीलाई सेवा प्रदान गर्न सजिलो हुने बताउनुभएको छ । केहि महिनादेखि डाक्टरविहीन भएको ५–५ शैयाको दुई नगर अस्पताल साउन महिनादेखि डा. गजल पन्त र डा. नरेन्द्र केसीद्वारा सञ्चालन भएको छ । नगर अस्पतालका दुबैजना डाक्टरले राजीनामा दिएसँगै उपमहानगरले डाक्टर, अनमी र अहेवको लागि आवेदन माग गरेको थियो । यस्तै, उपमहानगरपालिकाले ५ जना अहेब माग गरेकोमा ३३ जनाले आवेदन दिएका थिए । ४ जना अनमी माग गर्दा २९ जनाले आवेदन दिएका थिए ।
