हेटौंडाः मकवानपुर जिल्लाको ६६ वटा विद्यालयबाट २० प्रतिशतभन्दा कम विद्याथी उत्तीर्ण भएका छन् । माध्यमिक शिक्षा परीक्षा (एसर्ईई)–२०८० को नतिजाअनुसार जिल्लाका एक सय ३८ वटा विद्यालयमध्ये ६६ वटा विद्यालयले २० प्रतिशतभन्दा बढी विद्यार्थी उत्तीर्ण गराउन असफल भएका हुन् ।
एसईईमा जिल्लाका १७ वटा विद्यालयको उत्तीर्ण दर शून्य छ । एउटा संस्थागत र १६ वटा सामुदायिक विद्यालयबाट एसईई दिएका एक जना विद्यार्थी पनि उत्तीर्ण नभएका हुन् । एसईईमा विद्यार्थी सहभागी गराएका ५५ वटा विद्यालयले मात्र २० प्रतिशतभन्दा बढी विद्यार्थी उत्तीर्ण गराएका छन् ।
विद्यार्थी उत्तीर्ण गराएका मध्ये जिल्लाको कैलाश गाउँपालिका, कालिकाटारस्थित भवानी माध्यमिक विद्यालयले एक जनामात्र विद्यार्थी उत्तीर्ण गराएर जिल्लाकै कम १.८५ प्रतिशत नतिजा ल्याएको छ । भवानी माविबाट परीक्षा दिएका ५४ जना विद्यार्थीमध्ये ५३ जना विद्यार्थी अनुत्तीर्ण भएका छन् । जिल्लाको एकसय ४ वटा विद्यालयबाट ५० प्रतिशतभन्दा बढी विद्यार्थी अनुत्तीर्ण भएका छन् ।
मकवानपुर जिल्लाबाट एसर्ईई परीक्षामा ५ हजार ९ सय १९ जना विद्यार्थी सहभागी भएका थिए । जसमा ३ हजार ७ सय ६८ जना विद्यार्थीको नतिजा एनजी आएको छ । एसईईमा उत्तीर्ण हुने विद्यार्थीको प्रतिशत ३६.४९ रहेको छ भने एसईईमा अनुत्तीर्ण हुने विद्यार्थीको प्रतिशत ६३.५१ रहेको छ ।
एसईईमा एनजी ल्याउने अर्थात् अनुत्तीर्ण हुने विद्यार्थीका लागि साउन २३ गतेदेखि ग्रेडवृद्धि (मौका) परीक्षा सञ्चालन हुनेछ । ग्रेडवृद्धि परीक्षाका लागि मकवानपुर जिल्लाको हेटौंडा उपमहानगरपालिकामा ५ वटा, थाहा नगरपालिका, बकैया गाउँपालिका र मनहरी गाउँपालिकमा एउटा–एउटा परीक्षा केन्द्र तोकिएको छ । तोकिएको ८ वटा केन्द्रबाट ३ हजार ८ सय जना विद्यार्थीले मौका परीक्षा दिनेछन् ।
