हेटौँडाः मकवानपुरको थाहा नगरपालिका–६ स्थित बज्रबाराही स्वास्थ्य चौकी जिल्लाकै सर्वोत्कृष्ट स्वास्थ्य चौकी घोषणा भएको छ । न्यूनतम सेवा मापदण्ड सम्बन्धी समिक्षा कार्यक्रममा ९६ प्रतिशत अंक हासिल गर्दै बज्रबाराही स्वास्थ्य चौकी जिल्लाकै सर्वोत्कृष्ट स्वास्थ्य चौकी घोषणा भएको हो । जनस्वास्थ्य कार्यालय मकवानपुरका प्रमुख कृष्ण बहादुर मिजारको सभाध्यक्षतामा कार्यक्रम भएको हो ।
सुशासन व्यवस्थापन (९८ प्रतिशत), टेलिकम सेवा व्यवस्थापन (९६ प्रतिशत) र स्वास्थ्य चौकी सेवा व्यवस्थापन (९५ प्रतिशत) मा पर्ने विभिन्न विधामा उच्च अंक प्राप्त गर्दै सर्वोत्कृष्ट भएको हो । जनस्वास्थ्य कार्यालय मकवानपुरको आयोजनामा भएको दुई दिने कार्यक्रममा पालिकाका स्वास्थ्य शाखा प्रमुखहरुले समीक्षा प्रस्तुतीकरण गर्नु भएको थियो । जनस्वास्थ्य कार्यालय मकवानपुरकी अधिकृत शिखा भुजेलका अनुसार जिल्लाको ११ वटा स्वास्थ्य संस्थाले ८५ प्रतिशतभन्दा बढी अंक हासिल गरेका छन् ।
यस्तै, १८ वटा स्वास्थ्य संस्थाले ७० प्रतिशतदेखि ८४ प्रतिशत, १३ वटा स्वास्थ्य संस्थाले ५० देखि ६९ प्रतिशत अंक हासिल गरेकोमा एउटा स्वास्थ्य संस्थाले ५० प्रतिशत भन्दा कम अंक प्राप्त गरेको छ । कार्यालयले स्वास्थ्य संस्थाको न्यूनतम सेवा मापदण्डलाई हरियो, निलो, पहेँलो र सेतो गरी ४ वटा वर्गमा छुट्याएको छ । हेटौँडा उपमहानगरपालिकातर्फ चौघडाको हेटौँडा स्वास्थ्य चौकी उत्कृष्ट घोषणा भएको छ ।
यस्तै, थाहा नगरपालिकाको बज्रबाराही स्वास्थ्य चौकी, कैलाश गाउँपालिकाको भार्ता स्वास्थ्य चौकी, राक्सिराङ गाउँपालिकाको काँकडा स्वास्थ्य चौकी, भीमफेदी गाउँपालिकातर्पm भैंसे स्वास्थ्य चौकी उत्कृष्ट घोषणा भएको छ । इन्द्रसरोवर गाउँपालिकाको सिस्नेरी स्वास्थ्य चौकी, मकवानपुरगढी गाउँपालिकाको मकवानपुरगढी स्वास्थ्य चौकी, बकैया गाउँपालिकाको शिखरपुर स्वास्थ्य चौकी र बागमती गाउँपालिकातर्पm बेतिनी स्वास्थ्य चौकी उत्कृष्ट घोषणा भएको छ ।
