मकवानपुरका केही संस्थागत विद्यालयका शिक्षक, कर्मचारीले लकडाउनको अवधिका पारिश्रमिक नपाएको गुनासो गरेका छन् । विद्यालय खुल्ने विषय अनिश्चित रहेको हुँदा आगामी दिनमा पनि पारिश्रमिक नपाउने त्रासले शिक्षक, कर्मचारी पीडित छन् । संस्थागत विद्यालयमा कार्यरत शिक्षकको संगठन संस्थागत विद्यालय शिक्षक यूनियन (इस्टु) ले सरोकारवालालाई शिक्षक, कर्मचारीको सेवा, सुविधा दिलाउन ध्यानाकर्षण समेत गराएको छ । यसै सन्दर्भमा इस्टु मकवानपुरका अध्यक्ष सचिन लामासँग समृद्ध समाज दैनिकका संवाददाता रामनाथ कुँवरले गर्नुभएको कुराकानीः
समाजः संस्थागत विद्यालयका शिक्षक कर्मचारीहरुले सेवा—सुविधा पाएनन् भनिरहनुभएको छ । सेवा—सुविधा नपाउनुको कारण के हो ?
लामाः वास्तवमा अहिले यो कोभिड–१९ ले विश्वलाई आक्रान्त बनाएको अवस्थामा नेपाललाई पनि अछुतो बनाएको छैन । पेशागत कुरामा मकवानपुरका संस्थागत विद्यालयहरुमा कार्यरत शिक्षक कर्मचारीहरुले गत २०७६ माघदेखि नै सेवा सुविधा नपाएको गुनासो छ ? यसमा नितान्त रुपमा भन्नुपर्दा विद्यालयले चैत मसान्तसम्मको शुल्क पनि असुली गरिसकेको र अहिले विद्यालय सञ्चालकहरुले आफ्नो रवैया प्रस्तुत गरेको हाम्रो गम्भीरतापुर्वक ध्यानाकर्षण भएको छ ?
समाजः कति विद्यालयहरुले अर्थात कुन—कुन विद्यालयहरुले शिक्षक कर्मचारीहरुको सुविधा उपलब्ध गराएनन् ?
लामाः मकवानपुर जिल्लामा माघ, फागुनदेखि नै तलब नदिएका थोरै विद्यालय छन् भने चैतसम्मको अधिकांश विद्यालयहरुले सुविधा उपलब्ध गराएका छन् । बैशाखदेखि केहि विद्यालयहरुले सहमति गरेर प्रतिशतको हिसाबले दिनेमा बार्गेनिङ गरिरहेका छन् । ति कुराहरु हाम्रो लागि अस्विकार्य हुनेछन् । किनभने कम्पनी ऐन अनुसार उहाँहरुले विद्यालय चलाएको अवस्थामा र श्रम ऐन अनुसार हेर्ने हो भने पनि शिक्षक कर्मचारीको सेवा सुविधा उहाँहरुले निकासा गर्नु पर्छ भन्ने हाम्रो ध्यानाकर्षण भएको छ ।
समाजः यतिबेला त विद्यालयहरु पनि मारमा छन् । यसलाई कसरी लिनुभएको छ ?
लामाः यसलाई हामीले प्राविधिक रुपमा हेर्दा हिजोको दिनमा दुई कठ्ठामा सुरु भएको विद्यालयहरु शिक्षक कर्मचारीहरुको सहयोगले विद्यालयहरु भौतिक रुपमा विकास भएको छ । त्यसैले कम्पनी ऐनअनुसार कम्तीमा पनि ६ महिनासम्म कम्पनी बन्द भएमा कर्मचारीहरुलाई सेवा सुविधा उपलब्ध गराउनु पर्छ । अहिले विद्यालय सञ्चालकहरुले शिक्षक कर्मचारीहरुलाई हेपाहा शैली देखाएको हो । अहिले चैतसम्मको शुल्क उठाएर पनि चैतसम्मको तलब नदिएको अवस्था छ । विद्यालयहरु नचलेको हो तर पनि उहाँहरुले सञ्चित गरेको रकमबाट शिक्षक, कर्मचारीले सेवा सुविधा पाउनु पर्छ । त्यहि अनुसार हामीले चरणवद्ध कार्यक्रमको तयारी पनि गरिएको छ ।
हामीले ध्यानाकर्षणपत्र प्याव्सन मकवानपुर, हेटौंडा उपमहानगरपालिका, जिल्ला समन्वय समिति मकवानपुर र शिक्षक महासंघ लगायतलाई ज्ञापनपत्रमा शिक्षक, कर्मचारीका समस्या, त्यसका जटिलताहरु समावेश गरेर चरणवद्ध रुपमा ज्ञपनपत्र बुझाएका छौं । सोही अनुरुप हाम्रो शुक्रबार पनि बुद्धचोकमा मौन प्रदर्शन पनि रहेको छ । हाम्रो राष्ट्रिय समितिले पुर्व झापादेखि पश्चिम बाँकेसम्म हाम्रो चरणवद्ध संघर्षको कार्यक्रमहरु अगाडि बढाएर आफ्नो सेवा सुविधा लिनको लागि हामी तत्पर रहने छौं ।
समाजः समस्यामै रहेका विद्यालय सञ्चालकहरुले कसरी भुक्तानी गर्ने ?
लामाः यदि समस्यामै विद्यालय हो भने ति विद्यालयहरुले उक्त विद्यालयहरुको शेयर चै विद्यालयका शिक्षक कर्मचारीहरुको नाममा हस्तान्तरण गर्नु पर्छ ।
समाजः अब स्थानीय सरकारसँग तपाईहरुले के अपेक्षा गर्नुभएको छ ?
लामाः स्थानीय सरकारसँग हामीले समन्वयकारी भूमिकाको अपेक्षा गरेका छौं । स्थानीय सरकारले हरेक समस्यालाई समाधान गरेर अगाडि बढिरहनु भएको छ । संस्थागत विद्यालयका शिक्षक, कर्मचारीले पनि जनप्रतिनिधिलाई भोट दिएर जिताएकै हो । त्यसैले स्थानीय जनप्रतिनिधिहरुले हामीलाई हेर्ने दृष्टिकोण र गर्ने भूमिका चै सकारात्मक हुन्छ भन्नेमा विश्वस्त छौं ।
समाजः विद्यालयहरुले सेवा सुविधा नदिएमा तपाईहरु के गर्नुहुन्छ ?
लामाः अब हामी चरणवद्ध आन्दोलनमा जान्छौं । इतिहास हेर्ने हो भने हिजोको दिनमा सरकारी विद्यालयहरुका शिक्षक, कर्मचारीहरुले पाइरहेको सेवा सुविधा नेपाल सरकारले पनि लिनुस् भनेर दिएको होइन्, शिक्षकहरुले वर्ग सङ्घर्ष गरेर प्राप्त गरेको हो । अहिले हामी पनि आफ्नो पारिश्रमिक, आफ्नो अधिकार र कर्तव्यलाई पनि महत्व दिएर अगाडि बढ्छौं ।
