हेटौँडाः बागमती प्रदेशसभा सदस्य श्याम खड्काले नेपाल सरकार टाट पल्टने अवस्थामा रहेको टिप्पणी गर्नुभएको छ । नेपाल सरकारको कुल बजेट भन्दा वैदेशिक ऋण बढी रहेको उहाँले बताउनु भएको छ ।
मंगलबार बसेको प्रदेशसभा बैठकमा ७ वटा मन्त्रालयको विनियोजन विधेयक माथि छलफल गर्दै कांग्रेस सांसद खड्काले नेपाल सरकारको बजेट १८ खर्ब रहेको र वैदेशिक ऋण २४ खर्ब रहेको बताउनुभयो । यथास्थिती रहेको खण्डमा सरकार आर्थिक रुपमा टाट पल्टने निश्चित रहेको उहाँले बताउनुभयो ।
‘सरकारको बजेट अनुत्पादक क्षेत्रमा खर्च भइरहेको छ।, देशमा ऋणको भार थपिदै गएको छ । सरकारको आय छैन । व्यय मात्र बढिरहेको छ । उत्पादनमुखि कार्यक्रम ल्याउन सरकार असक्षम बनेको छ ।’ उनले भने ‘ बागमती प्रदेश सरकारको बजेट बालुवामा पानी खनाए सरह रहेको छ । सरकारको बजेटमा स्पष्ट कार्यक्रम छैन । सरकारको बजेट उपलब्धी हिन क्षेत्रमा लगानी भइरहेको छ ।’
उहाँले बागमती सरकारको खर्च गर्ने सामर्थ नरहेको बताउनुभयो । प्रदेश सरकारले हरेक वर्ष ६६ प्रतिशत मात्र बजेट खर्च गर्दै आएको उहाँको भनाई छ । भौतिक पूर्वाधार विकास मन्त्रालयको बजेटमा १२ अर्व बजेटको कार्यक्रम समावेश नभएको उहाँको भनाई छ ।
प्रदेश सरकारले अर्थ मन्त्रालयमा अवण्डामा राखिएको ४ अर्व बजेटको उद्देश्य के हो ? उनले प्रश्न गरे । ‘सो बजेटको स्पष्ट योजना र कार्यक्रम समावेश गर्न नसक्नुको कारण के हो ?’ उहाले भन्नुभयो ।
